Zvicra zgjeron opsionet e shërbimit “Air Rail” në vendpushimet alpine

Linja ajrore SWISS dhe kompania kombëtare hekurudhore SBB kanë zgjeruar shërbimin e tyre Air Rail në disa destinacione të reja në Graubünden.

Shërbimi i përbashkët u lançua për herë të parë në vitin 2020 gjatë pandemisë Covid, kur 10 fluturime ditore midis aeroporteve të Cyrihut dhe Gjenevës u pakësuan në vetëm dy, dhe trenat u vunë në shërbim në vend të tyre midis dy qendrave.

Që atëherë, ky kombinim i biletave të fluturimit dhe trenit është zgjeruar për të mbuluar më shumë stacione: 21 qytete, si në Zvicër ashtu edhe jashtë saj.

Dhe nga 2 tetori, SWISS dhe SBB do të shtojnë katër destinacione të reja në rrjetin e tyre Air Rail.

Shtesat më të reja janë kryeqyteti i kantonit Chur, si dhe vendpushimet e njohura alpine të Davos, Klosters dhe St. Moritz, përcjell albinfo.ch.

Ku mund të udhëtoni me Air Rail?

Përveç katër destinacioneve të reja, ju mund të përfitoni nga oferta e kombinuar për në dhe nga qytetet zvicerane të Baselit, Bellinzona, Bernë, Brig, Fribourg, Gjenevë, Interlaken, Lozanë, Lugano, Lucerne, Montreux, Sierre, Sion, Vevey dhe Visp në Zvicër.

Gjithashtu, në rrjet janë përfshirë edhe Mynihu në Gjermani dhe Bregenz në Austri.

Kjo hartë nuk përfshin ende katër destinacionet e reja, por ju tregon se ku mund të shkoni dhe nga cili aeroport.

Si mund të përfitoni nga ky sistem?

Nëse dëshironi të merrni një tren nga një nga qytetet e mësipërme për në aeroportin e Cyrihut ose Gjenevës, nuk keni më nevojë të blini veçmas një biletë treni dhe një biletë avioni.

Ju duhet të bëni vetëm një rezervim me SWISS për të gjithë udhëtimin me tren dhe aeroplan.

Ju mund ta bëni këtë përmes kësaj lidhjeje në faqen e internetit të linjës ajrore, duke zgjedhur se në cilën klasë dëshironi të udhëtoni me tren dhe aeroplan.

“Kur nis udhëtimin, udhëtari duhet të bëjë check-in vetëm një herë, dhe më pas do t’i lëshohet karta e imbarkimit (që përfshin biletën e tij hekurudhore) direkt nga SWISS,” tha linja ajrore, shkruan thelocal.

Sistemi është fleksibël

“Klientët e SWISS Air Rail mund të përdorin gjithashtu biletën e tyre hekurudhore një ditë pas mbërritjes së tyre SWISS ose një ditë para nisjes së tyre SWISS nëse preferojnë, gjë që u jep atyre fleksibilitet më të madh në planifikimin e udhëtimit,” tha linja ajrore.

Do të keni gjithashtu një ‘garanci lidhjeje’ në rast vonese.

Për më tepër, bileta ofron të njëjtin kompensim të vonesës si një fluturim lidhës. Kjo do të thotë që nëse fluturimi juaj vonohet dhe ju humbisni trenin, do të rezervoheni për një shërbim tjetër hekurudhor pa pagesë. Ndoshta më e rëndësishmja, nëse treni juaj vonohet dhe ju humbisni fluturimin, gjithashtu do të rezervoheni pa pagesë.

Dhe nëse jeni anëtar i Miles & More – i cili, përveç SWISS, përfshin Lufthansa (si dhe linja të tjera ajrore në grup) – do të fitoni milje dhe pikë edhe për udhëtimin hekurudhor.

Kini parasysh megjithatë se Air Rail mund të rezervohet vetëm nëse udhëtoni me SWISS ose anëtarë të tjerë të grupit Lufthansa; nuk vlen për të gjitha linjat ajrore.

---