Ylberi, doktori i shumë diplomave universitare 

“Të jesh i doktoruar në Zvicër është një privilegj dhe nder, si në aspektin moral, financiar dhe në aspektin shoqëror”, thotë Dr. Ylber Qusaj, doktorant i farmacisë 

Ylber Qusaj, është doktor shkence në Zvicër. Ka përfunduar me sukses studimet e larta për mjekësi dhe mban titullin “Doktorant” në farmaci. Tani ushtron profesionin e tij si ekspert për shkencë, teknologji dhe prodhim të medikamenteve të reja klinike dhe komerciale në kompaninë Lonza AG, Stein, Zvicër. 

Ai tregon për revistën Albinfo.ch rreth punës së tij si farmacist, jetës, sfidave, migrimit dhe ambicieve të tij për të ardhmen. 

Pa dyshim biografia e tij është njëra ndër historitë e suksesit të diasporës sonë në fushën e mjekësisë. Albinfo.ch ka zhvilluar një intervistë për jetën dhe sukseset e tij.  

Albinfo.ch – Mund të zbuloni për lexuesit tanë rrugëtimin tuaj privat dhe profesional?  

Ylber Qusaj: Unë jam Ylber Qusaj, jam nga fshati Pllajnik, Komuna e Dragashit, Kosovë. Si fëmijë kam pasur ambicie dhe dëshirë të madhe për shkollim dhe edukim të vazhdueshëm. Pas shkollimit të mesëm si Teknik Medicinal, kam ndjekur studimet për farmaci, në Universitetin shtetëror të Tetovës në Maqedoni. Jam me fat që pata nderin të takoj bashkëshorten time, dhe pas përfundimit të studimeve në fund të vitit 2017 kam emigruar në Zvicër për bashkim familjar. Në atë kohë nuk kisha njohuri të gjuhës gjermane në Zvicër, dhe vështirësitë ishin në vitin 2008 deri 2010, thellimi dhe mësimi i gjuhës. Edhe pse në atë kohë njohuritë në gjuhë thelloheshin, ende kisha shumë ngecje në të kuptuar dhe të folur të dialektit vendor “Schweizer Deutsch”.  

Me startimin në industrinë farmaceutike në Zvicër, integrimi dhe rruga ime profesionale në Zvicër është avancuar shumë dhe kjo më mundësoi edhe të vazhdoj studimet e doktoratës dhe pastaj edhe punësimin tim në gjigantin e industrisë farmaceutike, Novartis. 

Albinfo.ch – Sa dinit për Zvicrën para se të emigronit këtu dhe a vazhdon Zvicra ende të mbetet ashtu siç e keni paramenduar para se të emigronit?  

Ylber Qusaj: Para se të emigroja kam mësuar dhe dëgjuar më shumë për Zvicrën nga bashkëshortja ime për kualitetin, përkushtimin për punën dhe mundësitë e avancimit në Zvicër. Ajo ka emigruar si fëmijë në Zvicër dhe ka pasur mundësitë të ndjekë të gjitha fazat e shkollimit këtu. Edhe pse në atë kohë informacionet ishin të kufizuara, kisha pak njohuri rreth të ardhmes time dhe ushtrimit të profesionit të farmacistit në Zvicër. Ëndrrën time e kisha shumë të qartë në kojë: të mësoja gjuhën gjermane, të integrohem dhe të punoj në një kompani të madhe farmaceutike zvicerane.  

Nisur nga ambicia dhe sukseset e mia, komuna ku kam banuar më ka financuar plotësisht kursin për thellimin dhe mësimin e gjuhës gjermane. Në atë kohë kam mundur të kuptoj se sistemi në shtetin zviceran është shumëdimensional dhe ju mundëson dhe lehtëson rrugën atyre që kanë ambicie për t‘u integruar dhe avancuar në profesionet e tyre. Edhe pse nuk kanë kaluar shumë vite që kam emigruar, shteti zviceran është një vendlindje e dytë për mua, e cila më ka mundësuar të avancoj, të vazhdoj studimet post-diplomike dhe të integrohem në atë formë që të ndiej veten si në vendlindjen time.  

Albinfo.ch – Çfarë shkollimi keni ndjekur dhe në cilat periudha?  

Ylber Qusaj: Shkollën fillore e kam përfunduar në vendlindje, të mesmen për mjekësi të Përgjithshme e kam ndjekur në “Luciano Matroni”, Prizren, një paralele e ndarë në Dragash. Edhe pse isha në fillime të profesionit, nga mungesa e profesionistëve mjekësorë si teknikëve medicinalë në fshatin ku kam jetuar që nga viti 1998 kam ushtruar profesionin e plotë si teknik medicinal në fshat.  

Nga 2002-2007, studimet pesëvjeçare i kam vazhduar, në degën e Farmacisë Universitetin shtetëror të Tetovës, Maqedoni.  

Nga nëntori 2007 jam shpërngulur për bashkim familjar në Zvicër. 2008-2009 kam ndjekur një kurs intensiv të gjuhës gjermane në Benedict-Schule, St. Gallen, deri në nivelin C1. Kurse, në tetor 2009 kam filluar studimet e doktoratës në Universitetin e Bazelit, në Zvicër dhe nga viti 2009-2013 kam ndjekur studimet e doktoratës në Universitetin e Baselit. Pastaj nga viti 2011 e kam vazhduar doktoratën në Universitetin e Strasburgut dhe atë e kam mbrojtur me titullin “Optimizimi dhe investigimi i tabletave Echinacea me teknologjinë “base granulate”. Doktorata ishte një bashkëpunim ndërmjet Universitetit të Baselit, Universitetit të Strasburgut dhe kompanisë Bioforce në Zvicër ku kam mundur të ndjek doktoratën.  

Albinfo.ch – Çfarë pune bëni, cilat janë detyrat apo përgjegjësitë që ju keni?  

Ylber Qusaj: Që nga koha e shpërnguljes në Zvicër për bashkim familjar një vit më pas fillova stazhin e punës në zbulimin dhe zhvillimin e medikamenteve me bazë bimore në industrinë farmaceutike Bioforce AG (A. Vogel), Roggwil (TG). Dhe aty kam qenë i privilegjuar të ndjek studimet e doktoratës në lëmin e farmacisë, Vlen të theksohet, se nga ambiciet, puna dhe sukseset e mija, kompania Bioforce më mundësoi finalizimin e doktoratës. 

Pas përfundimit të doktoratës, nga viti 2013 fillova punën në kompaninë shumë të njohur farmaceutike Novartis AG, Stein, Zvicër si një ndër ekspertët/menaxherët në lëmin e zhvillimit dhe prodhimit të medikamenteve. Këtu kam thelluar më tepër njohuritë në zhvillimin dhe prodhimin format sterile, tabletat dhe kapsulat. Në atë kohë isha në disa pozicione të ndryshme ku kam mbledhur përvoja të mira rreth zhvillimit dhe prodhimit të medikamenteve me kualitetet më të lartë duke përfshirë teknologjitë dhe eksperiencat më të mira. 

Kurse nga viti 2019 fillova si ekspert për shkencë, teknologji dhe prodhim të medikamenteve të reja klinike dhe komerciale në kompaninë Lonza AG, Stein, Zvicër.  

Ne prodhojmë medikamentet e reja që aplikohen tek pacientët në mënyrë intravenoze dhe intramuskulare, si vaksinat etj. Roli im është menaxhimi i zhvillimit dhe prodhimit të projekteve të reja që këto produkte të shkojnë deri tek pacienti.  

Albinfo.ch – Cili është roli juaj sot në shoqëri, në punë e jashtë e saj?

Ylber Qusaj: Në punë jam shumë i respektuar dhe i dashur me stafin ku punoj. Gjithmonë marr feedback të mirë nga punëtorët ku punoj. Përveç punës ditore që kryej në menaxhim të projekteve, kam edhe një rol udhëheqës për kompaninë Lonza Stein për diversitetin dhe përfshirjen e punëtorëve në punë.  

E ndiej vetën shumë të privilegjuar dhe të respektuar në shoqërinë zvicerane si dhe të gjithë komunitetit shqiptar që jeton në komunën time në Zvicër. Ndërmjet facebook, apo edhe kur takohemi me ndonjë nga komuniteti shqiptar këtu në Zvicër si dhe në Kosovë, më shtrohen shumë pyetje në lidhje me medikamentet dhe përdorimin e tyre.  

Gjithashtu, ndaj një respekt të veçantë për të gjithë shqiptarët që punojnë në kompaninë Novartis dhe Lonza. Shpesh bëj organizime për takime vjetore me gjithë shqiptarët që punojnë në këto kompani, për t’i afruar, njohur dhe shkëmbyer njohuritë e tyre të përfituara në industritë farmaceutike.    

Albinfo.ch – Çfarë do të thotë të jesh i doktoruar në farmaci në vendin e Novartis e kompanive tjera zvicerane te prodhimit të medikamenteve? 

Ylber Qusaj: Të jesh i doktoruar në Zvicër është një privilegj dhe nder, e sidomos në këto kompani të mëdha, si në aspektin moral, financiar dhe në aspektin shoqëror. Për të marrë këtë titull është e vështirë, të duhet shumë punë dhe përkushtim. Mirëpo edhe njeriu e mban titullin me punën dhe raportin social që tregon në shoqëri. Unë jam shumë i pranuar në këtë shoqëri dhe e ndiej veten një doktor i farmacisë shumë i suksesshëm.   

Si një ekspert dhe doktorant në këto kompani, në momentet kur jep një këshillë apo inovacion në stafin ku punon, të dëgjojnë me vëmendje dhe aplikojnë idetë dhe mendimet e tua.  

Në vitin 2018 kam marrë edhe një çmim AWARD «Stein Rubin» nga kompania Novartis me idetë e mia është bërë optimimi i një procesi të brendshëm në prodhim të medikamenteve që mund të ndihmojnë kompaninë në uljen e çmimit në prodhim.  

Albinfo.ch – Keni ndonjë angazhim tjetër? 

Ylber Qusaj: Nga viti 2020 jam i angazhuar edhe si ligjërues për prodhimin e avancuar të medikamenteve në Kolegjin Rezonanca, Prishtinë, Kosovë. Pas një martese të suksesshme dhe si prind jam shumë i angazhuar në familjen time dhe me tre fëmijët e mi.  

---