Testet e gjermanishtes ndajnë çiftet në Kosovë

Albinfo.ch” ishte e pranishme gjatë mbajtjes së një testi të gjermanishtes në qendrën “SLZ” në Prishtinë

Testi i nivelit A1 i gjuhës gjermane po u krijon vështirësi të madhe një pjese të qytetarëve në Kosovë të cilët dëshirojnë të bëjnë bashkim familjar në vendet si
Gjermania. Ndonëse është nivel fillestar, megjithatë shumë prej tyre po hasin në probleme për të kaluar këtë test. Vështirësi më të madhe po kanë personat me nivel të ulët të shkollimit dhe gjeneratat e moshuara. Mosdhënia e këtij provimi për muaj dhe vite të tëra tek shumë çifte në Kosovë ka çuar deri në ndarjen e tyre.

Njëra nga qendrat e autorizuara për të mbajtur provimin e këtij niveli është Qendra e Mësimit të Gjuhës në Prishtinë “SLZ”, Partner i Institutit Gëte. “Albinfo.ch” ishte e pranishme gjatë një ditë të mbajtjes së këtij testi në Prishtinë.

E mërkurë, mëngjes. Hapësira para objektit të Qendrës së Mësimit të Gjuhës “SLZ” (Sprachlernzentrum) në Prishtinë është e mbushur me njerëz të moshave të ndryshme. Presin të hyjnë në testin e gjuhës gjermane A 1, i cili tash e sa vite është kusht për të gjithë ata që dëshirojnë bashkim familjar në Gjermani e Austri. Një grup kandidatesh mundoheshin të flisnin nga pak gjermanisht duke testuar njëri tjetrin për ato që kanë mësuar paraprakisht në kurse apo shkolla të gjuhës gjermane që kohëve të fundit janë hapur në çdo cep të Kosovës.

Miradija i ka hyrë mësimit të gjermanishtes nga halli E, derisa priste që t’i thirrej emri, Miradije Gërbeshi 51 vjeçare ishte strukur në një qoshe dhe dridhej nga emocionet. Aq shumë kishte tremë sa që mezi arritëm të bisedonim më të. “Po pres të hy në test”, na tha ajo më një zë të gjysmë shterur.

Gruaja e cila nuk e kishte të përfunduar as shkollën fillore, i duhet tash në moshën mbi 50 vjeçare ta sprovojë veten jo në gjuhën e saj amtare, por në gjuhën gjermane.

“Është e treta herë që po hy në këtë provim. Jam lodh me të. Kam ndjek kurse këtu në Prishtinë, por nuk po mundem me mësu. Unë as shkollën fillore nuk e kam krejt
të përfunduar sepse në atë kohë nuk më lejonte familja të shkollohem. Tash i kam mbush mbi 50 vjeç dhe truri është lodh, nuk mund të mbajë mend aq sa i një të riu”, shprehet zonja Gerbeshi e cila pi pakëz ujë, i lagë duart dhe pastaj shprehet: “E kam burrin në Gjermani. Prej para luftës jeton atje. Deri tash nuk ka mundur të na marrë për shkak të pagës së tij të vogël. E kemi një vajzë 12 vjeçare dhe shkaku i saj po duhet të bëjmë gjithçka që të shkojmë dhe të bashkohemi me burrin tim”, thotë Miradija nga Hajvalia e Prishtinës, ndërsa i thirret emri që të hyjë në sallën e provimit.

E ndërkohë derisa “Albinfo.ch” ishte aty e pranishme, nga disa kandidatë të tjerë që prisnin të hynin në grupin tjetër, dëgjohej gjithfarë muhabeti. Tregonin se për shkak të mossuksesit të këtij testi, shumë çifte edhe janë ndarë, andaj stresi dhe presioni shihej edhe më i madh në fytyrat e tyre. Kishte prej tyre që edhe thoshin: “Po ta dinim se është kaq vështirë, kurrë nuk do të pranonim të fejohemi jashtë”.

Pas afro dy orësh, kandidatët dolën nga salla. Ndërsa tek disa shihej zhgënjim, lot, hidhërim, tek ca të tjerë që besonin se kanë punuar mirë në test, shihej gëzim dhe përfaqim më familjarët apo me shoqëruesit e tyre, ani pse rezultatet iu dalin pas dy apo tri javësh.

– Kurset paraprake, ndihmesë për provimVilson Preqi nga Gjakova dukej i disponuar me të dalë nga testi. Sipas tij, ata që kanë bërë përgatitjen e duhur, nuk kanë nevojë të frikësohen. “Unë sapo dola nga testi. Sot hyra me shkrim, ndërsa pas dy ditëve kam për t`iu nënshtruar testit me gojë. Mua nuk m’u duk aq i vështirë, ndoshta sepse kam mësuar edhe shumë në kursin që unë e kam ndjekur në Gjakovë”, thotë Preqi. Ndonëse tha se është beqar, ai nuk përjashtoi mundësinë që në të ardhmen gjuha gjermane do t`i duhet edhe për ambiciet e tij në karrierë.

“Kam hyrë vetëm për dëshirë timen dhe për të testuar veten se sa e njoh gjuhën gjermane. Tash për tash nuk kam ndërmend për të shkuar jashtë, por jetës asnjëherë
nuk i dihet”, nënvizoi ai. Meritat për suksesin e tij, Vilsoni ia atribuon edhe shkollës së Gjuhës “West School” në Gjakovë ku ai ka bërë përgatitjet e duhura për të hyrë në këtë test.

Disa metra më larg Vilsonin e priste edhe drejtori i kësaj shkolle, Bernard Tanushi i cili kishte sjellë të gjithë kandidatet e shkollës së tij dhe ishte aty për t`u dhënë të paktën përkrahje morale. Me të biseduam për mënyrën se si punohet në këtë shkollë.

“Gjatë vitit kemi mbi 200 kandidatë që vijojnë kurse në shkollën tonë në Gjakovë.

Kemi kurse të të gjitha niveleve por më të kërkuarat janë këto për nivelin A1 që është për bashkim familjar. Natyrisht se në shkollën tonë ndjekin kurse edhe ata të cilëve nga shtetet ku do të shkojnë nuk u kërkohet testi detyrimisht, siç është Zvicra deri më tash. Kemi kandidatë që kursi u nevojitet për bashkim familjar, për studime jashtë vendit apo vetëm që e mësojnë për dëshirën e tyre. Deri më tash diku 80 – 90 për qind të kandidatëve tanë kanë kaluar testin në Qendrën e “SLZ’ dhe këtë ua vërtetojmë edhe më dëshmi. Suksesi arrihet vetëm më punë. Puna e sjell suksesin”, tha drejtori i Shkollës së gjuhëve të huaja “West School” në Gjakovë.

Revista “Albinfo.ch” ka provuar të kontaktojë edhe me Qendrën e Mësimit të Gjuhës “SLZ” e cila është partnere e Institutit Gëte, por nuk arriti të marrë përgjigje. Na thanë që pyetjet t`ua dërgojmë përmes adresës elektronike, dhe, ani pse pritëm për më shumë se një javë, nuk morëm përgjigje!

Arben Gjinaj

“Pishman” pse janë fejuar jashtë

Nga disa kandidatë që prisnin të hynin në grupin tjetër, dëgjohej gjithfarë muhabeti.

Tregonin se për shkak të mossuksesit të këtij testi, shumë çifte edhe janë ndarë, andaj stresi dhe presioni shihej edhe më i madh në fytyrat e tyre. Kishte prej tyre që edhe thoshin: “Po ta dinim se është kaq vështirë, kurrë nuk do të pranonim të fejohemi jashtë”.

---