“Shkolla Shqipe” në Zvicër reagon ndaj akuzave të LAPSH-it të Cyrihut

"Shkolla Shqipe" në Zvicër reagon ashpër ndaj këtyre akuzave false e të pabaza dhe hedh poshtë me përçmim çdo insinuatë, sipas të cilës Ambasada e Shqipërisë kinse ndërhyn në punët e LAPSH të Zyrihut", thuhet në reagimin e Shkollës Shqipe në Zvicër.

Në lidhje me një informatë që është publikuar ditë më parë në albinfo.ch, mbështetur në një publikim në rrjetet socaile nga LAPSH e Kantonit të Cyrihut, subjekti “Shkolla Shqipe” në Zvicër ka dërguar në adresën e redaksië sonë një reagim.

Në vazhdim po publikojmë reagimin, pa ndërhyrje të redaksisë:

U njohëm me postimin e bërë në faqen e Facebook-ut nga ana e kryesisë së LAPSH të Zyrihut dhe jehonën e bërë të këtij njoftimi në portalin Albinfo me një titull intrigues cituar nga përmbajtja e tekstit të degës së LAPSH për kantonin e Zyrih-ut sipas te cilit «Ambasada e RSH ndërhyn pa të drejtë në punët tona».
«Shkolla Shqipe» në Zvicër reagon ashpër ndaj këtyre akuzave false e të pabaza dhe hedh poshtë me përçmim çdo insinuatë, sipas të cilës Ambasada e Shqipërisë kinse ndërhyn në punët e LAPSH Zyrihut. Se cilat janë punët e LAPSH Zyrihut këtë e dinë ata. Një gjë është e sigurtë, Ambasada e RSH nuk ka ndërhyrë e nuk ndërhyn asnjëherë në punët e cilësdo shoqatë që vepron në Zvicër. Por, Ambasada e Shqipërisë, në përputhje me detyrat dhe funksionin e saj, nuk mund të qëndrojë indiferente ndaj çështjeve që lidhen me ruajtjen e identitetit kombëtar, nxitjen dhe promovimin e mësimit të gjuhës shqipe si element themelor në ruajtjen e identitetit të diasporës shqiptare jo vetëm në Zvicër, por kudo ku ka një diasporë të tillë.
Akuza false dhe të pabaza që adresohen ndaj «Shkollës Shqipe» nuk janë gjë tjetër veçse vijim i përpjekjeve të kahershme të disa ish drejtuesve të LAPSH të cilët, paaftësinë e tyre, mundohen ta mbulojnë me fjalë boshe dhe shpifje të përbuzshme të cilat synojnë të devijojnë vëmendjen e opinionit nga problemet reale të bartura prej vitesh e të shkaktuara pikërisht prej tyre.
Ne si «Shkollë Shqipe» duam pikësëpari të theksojmë se nuk ngatërrojmë një fraksion të LAPSH me LAPSH si organizatë ku falë punës së mësuesve, nxënësve e prindërve të devotshëm e të përkushtuar gjatë tre dekadave kanë luajtur një rol të madh në mësimin e gjuhës, kulturës e historisë shqiptare. LAPSH për Ambasadën e Shqipërisë ka qenë dhe mbetet një institucion i pazëvendësueshëm me një rol historik, atdhetar e për këtë duhet ruajtur e forcuar si një aset tepër i çmuar i komunitetit shqiptar në Zvicër.
Në dijeninë tonë, Ambasada e Republikës së Shqipërisë, ajo e Republikës së Kosovës si dhe Shkolla Shqipe në Zvicër në vite janë përpjekur që të kontribuojë modestisht në mbështetjen e veprimtarisë së kësaj organizate për aq sa ka qenë e mundur dhe për aq sa është dëgjuar zëri i tyre. Por, nuk mund të mohohet se vitet e fundit vitaliteti, organizimi dhe shtrirja e LAPSH në territorin e Konfederatës ka lënë për të dëshiruar. Për më tepër, që akuzat e drejtuara ndaj Ambasadës së RSH dhe «Shkollës Shqipe» për «paternalizëm», «përçarje», «obstruksionizëm» etj. Apo dhe dezinformacionet që shpërndahen në emër të LAPSH ku kumtohet se «Shkolla Shqipe (bie ndesh) me dokumentet e nënshkruar nga dy shtetet tona» janë të kahershme siç dhe janë tentativat për të përcjellë një mesazh , me dashje apo pa dashje, për të paraqitur Ambasadën e RSH si përçarëse të komunitetit shqiptar dhe se ”ajo nuk mbështet LAPSH, ndërkohë që Ambasada e RK e mbështet”. Këto janë jo vetëm teza të pabaza e të padenja për një organizate patriotike siç është LAPSH, por dhe shumë të dëmshme për kohezionin e faktorit shqiptar. Fakt i pamohueshëm është se sot “Shkolla Shqipe” në një periudhë relativisht të shkurtër kohe ka mundur të ketë rreth 890 nxënës në 75 pika shkollore me angazhimin e 35 arsimtarëve. ( Të gjitha klasat dhe arsimtarët të miratuar nga autoritetet kompetente zvicerane). I gjithë ky potencial ka qenë aty. «Shkolla Shqipe» nuk i është dashur të shpikë rrotën. Por, falë përkushtimit të arsimtarëve, u krijuan hapësirat për të dhënë këtë rezultat të prekshëm.. Ka një kontradiktë logjike në gjithë historinë dhe tymnajën e ngritur mbi dëmin e krijuar apo dualizmin e mësimit të gjuhës shqipe pasi nëse LAPSH të paktën këto tetë vitet e fundit ka mundësuar pjesëmarrjen e 1400 deri në 1800 nxënës për gjithë konfederatën, sot me angazhimin e Ambasadës, përmes «Shkollës Shqipe», janë shtuar edhe 890 syresh. Pra, tek e fundit, ka qenë komuniteti ynë që ka përftuar. «Shkolla Shqipe» ka qenë veçse një vlerë e shtuar në përpjekjet e përbashkëta për masivizimin e gjuhës shqipe dhe për këtë «Shkolla Shqipe dhe Ambasada e RSH ndihen krenare. «Shkolla Shqipe» dhe aq me pak Ambasada nuk janë në garë e konkurrencë me LAPSH-in e Zyrih-ut. Besoj se biem dakord se qëllimi i përbashkët është masivizimi i gjuhës shqipe.
Drejtuesit e LAPSH Zyrih-ut mund të pyesin 900 nxënësit dhe prindërit e tyre nëse ata ndihen të “ç’orientuar apo irrituar” për faktin që ndjekin mësimin në klasat e organizuara nga “Shkolla Shqipe”. Ku është konkurrenca e pandershme këtu? “Dëmin” që ka bërë «Shkolla Shqipe» sipas tyre është fakti që ka rritur me 900 nxënës numrin e fëmijëve që mësojnë gjuhën, kulturën dhe historinë shqiptare. Ja për këtë ankohen drejtuesit e LAPSH Zyrih-ut. Nxënësit që “Shkolla Shqipe” ka mundur të tërheqë në klasat e saj kanë qenë aty, por paaftësia organizative, kultura klanore dhe mbyllja në një rreth vicioz të një grushti drejtuesish “të pandryshueshëm” nuk i kanë dhënë frymëmarrje kësaj organizate kaq të rëndësishme për arsimin shqip.
Kërkesa për një përfshirje më aktive të institucioneve shtetërore në procesin e mësimit të gjuhës shqipe ka qenë e mbetet një kërkesë konstante e diasporës shqiptare. Në përgjigje të kësaj kërkese dhe në zbatim të legjislacionit në fuqi si dhe marrëveshjet mes dy shteteve( Shqipëri-Kosovë) për
arsimin në diasporë Ambasada e RSH ka ndërmarrë një angazhim direkt dhe është përfshirë në një proces konkret, serioz e impenjativ.
Për të sqaruar opinionin publik, në Zvicër nuk ka shkolla paralele, por vetëm organizata që ofrojnë mësimin e gjuhës shqipe në ruajtje të identiteteve të tyre përcaktuar në statuset e miratuara zyrtarisht nga autoritetet kompetente. Gjuha dhe standardet e mësimit të saj janë të unifikuara pavarësisht se mësimi i gjuhës shqipe nuk ofrohet vetëm nga LAPSH, por dhe organizata të tjera. Çfarë mund të thonë zotërinjtë e LAPSH Zyrih-ut për veprimtarinë mësimdhënëse të Universitetit Popullor të Gjenevës? Po për atë të ISEAL të cilët po ashtu ofrojnë mësime të gjuhës shqipe. Përse ky mllef ndaj Ambasadës së RSH e cila “mëkatin” e vetëm e ka që ka rritur numrin e nxënësve pjesëmarrës në klasat e mësimit të gjuhës shqipe. Çfarë e keqe i vjen LAPSH Zyrih-ut nga fakti që është rritur pjesëmarrja e fëmijëve shqiptarë në mësimin e gjuhës shqipe? Përgjigjen e kësaj ta japin ata pasi tek e fundit misioni i të gjitha shoqatave përfshirë LAPSH apo përfaqësitë diplomatike të të dyja shteteve, është rritja e pjesëmarrjes së numrit të nxënësve që mësojnë gjuhën e kulturën shqipe. Të tjerat janë thjesht pallavra.
Në emër të “Shkollës Shqipe” dëshirojmë të sqarojmë edhe një element thellësisht të rëndësishëm për tu kuptuar nga cilido që nuk e di apo bën sikur nuk e kupton. Mësimi i gjuhës shqipe në diasporë, në përputhje me atë çka lejon legjislacioni zviceran, rregullohet nga një sërë marrëveshjesh si dhe aktesh ligjore e nënligjore të qeverisë të Republikës së Shqipërisë dhe asaj të Republikës së Kosovës. Përmendim këtu Marrëveshjen për arsimin në diasporë midis këshillit të ministrave të Republikës së Shqipërisë dhe qeverisë së Republikës së Kosovës- 2017. Kurrikula e përbashkët për mësimin plotësues të gjuhës shqipe ne diaspore e Majit 2018; Ligj nr. 16/2018 për diasporën; Republika e Shqipërisë këshilli i ministrave v e n d i m nr. 756, datë 23.9.2020 Për funksionimin e komisionit të përbashkët të Shqipërisë dhe Kosovës për miratimin e teksteve të përbashkëta për diasporën; v e n d i m nr. 104, datë 28.02.2019 për përcaktimin e kritereve për krijimin e regjistrit shtetëror të mësuesve të gjuhës shqipe e të kulturës shqiptare dhe dhënien e certifikatës për nxënësit në diasporë; vendimi për krijimin e qendrës së përbashkët të botimeve për diasporën si dhe një sërë aktesh të tjera. Këto ligje, VKM apo akte nënligjore janë busulla orientuese në veprimtarinë e përfaqësive diplomatike sa i përket arsimit në diasporë dhe aspak dëshira voluntariste të individëve. Kjo gjë duhet kuptuar qartë e mirë. Çdo interpretim tjetër, në rastin më të mirë është pa dije, në atë më të keqin është e qëllimtë me synime përçarëse.
Në fund dy fjalë lidhur me LAPSH Zyrih. Sic është bërë i njohur opinioni publik, në muajin maj 2022 u kryen zgjedhjet e kryesisë së re të LAPSH dhe me shumicë dërrmuese u zgjodh Kryesia e re dhe drejtues i ri i LAPSH u zgjodh zoti Liburn Mehmetaj. Zgjedhja e z. Mehmetaj dhe kryesisë së re të LAPSH u përshëndet dhe mirëprit nga të dyja ambasadat e RSH dhe RK dhe posaçërisht nga Ambasadorët Gjoni dhe Ukelli të cilët, si dhe më parë, ofruan gjithë mbështetjen e tyre dhe të institucioneve që përfaqësojnë, në mënyrë që LAPSH si një organizatë e rëndësishme e arsimit shqip dhe me një traditë të hershme të mund të rigjejë vetveten e të dalë nga rrethi klanor, i cili e kish ngërthyer e atrofizuar për mbi një dekadë duke çuar në rënien drastike të numrit të nxënësve. Edhe unë personalisht si drejtues i “Shkollës Shqipe” jam bashkërenduar me z. Mehmetaj në mënyrë që të gjejmë rrugë e mënyra sa më efikase për të koordinuar veprimtarinë mësimdhënëse e unifikuar qëndrimet në përputhje me legjislacionin që rregullon arsimin në diasporë. Bashkëpunimi dhe ndërveprimi i “Shkollës Shqipe” me Kryesinë e re të LAPSH do të jetë i vazhdueshëm e i pandërprerë, pavarësisht devijimeve të ndonjë fraksioni të pakënaqurish.
Gjatë periudhës përgatitore të konferencës zgjedhore të dyja Ambasada si ajo e RK dhe ajo e Shqipërisë, bazuar në kërkesat e drejtuesve të LAPSH, u përfshinë në një proces konsultativ për të gjetur rrugë e mundësi që LAPSH të modernizohet e të mund të dalë nga kjo gjendje. Ka një korrespondencë shteruese mes këtyre institucioneve sidomos sa i përket adresimit të problematikave të dala prej kohësh në menaxhimin e LAPSH duke reflektuar si në këndvështrimin statutor ashtu dhe atë konceptual. Fatkeqësisht, ashtu siç është bërë e njohur dhe publike tashmë, drejtuesit e LAPSH Zyrih-ut ku janë të inkuadruar të gjithë ish drejtuesit e vjetër të LAPSH, pikërisht ata që çuan në degradimin e veprimtarisë së kësaj organizate, në mënyrë demonstrative u shkëputën nga LAPSH qendror duke mos njohur vendimet e shumicës dhe duke sjellë fatkeqësisht për pasojë përçarjen e LAPSH. Ku qëndron faji i “Shkollës Shqipe” në këtë histori vetëm mendjet e mbrapshta të këtyre drejtuesve arkaikë mund ti japin përgjigje.
“Shkolla Shqipe” ashtu si dhe deri me sot do të vijojë angazhimin maksimal për masivizimin e gjuhës shqipe dhe do të jetë në bashkëpunim të ngushtë e të përhershëm me Kryesinë legjitime të LAPSH. Komuniteti shqiptar në Zvicër nuk ka nevojë për të tilla ndasi të shtyra nga interesa të ngushta klanore. Aq më pak për teza të cilat cenojnë kohezionin mbarëshqiptar, thuhet në përmbyllje të reagimit nga “Shkolla shqipe” – Zvicër, nënshkruar nga Dr. Vaxhid Sejdiu – kryetar.

Një foto sa një mijë fjalë, e bërë në manifestimin shkollor, më 26 qershor 2022 (nga e majta në të djathtë), Sami Ukelli, (Ambasador i R. së Kosovës), Liburn Mehmetaj (kryetar i LAPSH – Zvicër), Ilir Gjoni ( Ambasador i R. së Shqipërisë), Kenan Ramadani ( Ambasador i R. së Maqedonisë së Veriut) dhe Vaxhid Sejdiu, (koordinator i “Shkollës Shqipe” në Zvicër.

---