Prezantohen dy libra të rinj të autorëve shqiptarë të Austrisë

Krijuesit shqiptarë nga Austria sjellin para lexuesve dy vepra të reja: Antologjinë "Illyricum" dhe përmbledhjen "Malli i pashtershëm" nga Mair Istrefi

Në prag të manifestimeve me rastin e 9 vjetorit të pavarësisë  së Kosovës, krijuesit shqiptarë nga Austria sjellin para lexuesve dy vepra të reja. Këto dy vepra do të prezantohen në Vjenë, në orën letrare që me këtë shkas organizon Lidhja e Shkrimtarëve dhe Krijuesve Shqiptarë në Austri “Aleksandër Moisiu”, më 17 shkurt 2017, duke filluar nga ora 18.

Qysh nga themelimi në vitin 2011 kjo Lidhje e krijuesve shqiptarë në Austri ka pas veti një numër të madh aktivitetesh kulturore dhe letrare gjithandej Austrisë, por edhe në vendlindje dhe gjetiu në diasporë. Përveç botimeve të shumta personale të krijuesve të tubuar rreth kësaj Lidhjeje, në vitin 2012 u botua antologjia e parë e krijuesve shqiptarë në Austri “Illyricum”, për t’u botuar një vit më vonë edhe në gjuhën gjermane.

Sivjet në bashkëpunim me Galaktikën Poetike “Atunis” nga Prishtina, doli nga botimi numri i dytë i kësaj antologjie dhe do të prezantohet në aktivitetin e radhës më 17 shkurt 2017 në Vjenë. Në këtë antologji prezantohen vetëm 12 krijues shqiptarë nga të gjitha viset e Austrisë, ndonëse në Austri jetojnë më shumë se kaq krijues, por të cilët për njërën apo tjetrën arsye nuk shprehën interes të jenë pjesë e kësaj antologjie.

Në brendi të kësaj antologjie kanë gjetur vendin krijime të ndryshme si poezi, prozë, piktura etj Parathënien e kësaj antologjie e kanë zbukuruar me fjalët e tyre ambasadori i R. së Shqipërisë në Austri z. Roland Bimo dhe ai i R. së Kosovës në Austri z. Sami Ukelli. Z. Bimo në fjalën e tij shprehet: “Të krijosh art, letërsi, prozë e poezi, pikturë dhe muzikë, është të japësh një pjesë nga vetja për të mirën e përbashkët. Të prodhosh ushqim shpirtëror për bashkatdhetarët larg atdheut është një kontribut i vyer për letrat shqipe në përgjithësi, por edhe për lartësimin e tyre në nivelin e kulturës dhe artit evropian. Meritë e veçantë e LSHKSHA është promovimi i vlerave të artit dhe kulturës shqiptare tek publiku austriak dhe gjermanofolës”.

Ndërsa z. Ukelli thotë: “Synimi i krijuesit është thyerja e barrierave të mundshme. Ai nuk njeh kufizim, ngaqë është i prirur për të prodhuar diçka të re, të shëndetshme për lexuesin dhe idenë e tij. Sikurse Austria që ka qenë zëdhënëse e përpjekjeve tona për liri dhe pavarësi si të Shqipërisë ashtu edhe të Kosovës, edhe ju sot, po në shtetin austriak, shërbeni si një lloj zëdhënësi të kulturës tonë”.

Libri i dytë që do të prezantohet në këtë orë letrare është vepra e parë e autorit strugan Mair Istrefi “Malli i pashtershëm”. Është kjo një përmbledhje me tregime dhe poezi. Këto shkrime të autorit datojnë nga koha e hershme e tij, kur si një i ri entuziast mori rrugën e studimeve për në Prishtinë. Në atë kohë të viteve 1986-88 gjendja politiko-shoqërore kishte nisur të shembet dhe trazirat e viteve 1981, dukej se sillnin valë të reja të turbullirave në trojet shqiptare. Dhe autori në tregimet dhe poezitë e tij shpreh pikëpamjet e tij, krijimet kanë një mesazh dhe kuptim të thellë mbi ngjarjet dhe rrethanat e atëhershme dhe pasqyrimet dhe perceptimet e tij.

Recensionin për këtë vepër e ka bërë Prend Buzhala, i cili mes tjerash thotë: “Vëllimi i Mair Istrefit “Malli i pashtershëm”, i përbërë nga pesë tregime dhe nga njëzet e tri poezi, përfshin krijime të gjysmës së dytë të viteve ’80, koha kur po shpërbehej shteti jugosllav dhe kur shqiptarët nën ish-Jugosllavi po vuanin dhunën e shfrenuar millosheviçiane. Më shumë është një faktografi e letrarizuar që e shënon në vargje jetën dhe frymëzimet e një kohe, ku e vërteta ende nuk mund të thuhej hapur. Mund të jenë, gjithsesi, të shumta arsyet përse ky vëllim erdhi vonë. Sido që të jetë, shkrimet letrare të këtij vëllimi ruajnë vulën e tyre krijuese të kohës, sidomos me tematikën e plagës së rëndë të kurbetit, me dramat e tragjeditë që sjellin ndarjet familjare…”.

Në këtë mbrëmje kulturore-letrare do të bëhet edhe prezantimi i veprës “Mos ma vetmo fjalën” të autores Helena Halilaj, e cila vjen si mysafire nga Shqipëria. Përndryshe disa nga krijuesit e pranishëm do të lexojnë krijimet e tyre më të reja, kurse programi do të shoqërohet me pika të zgjedhura muzikore dhe për fund do të shtrohet një koktej modest i rastit. Të gjithë të interesuarit të marrin pjesë në këtë aktivitet janë të mirëseardhur dhe mund të na vizitojnë të premten, më 17.02.2017, duke filluar nga ora 18 në këtë adresë: “Der Kunstraum” in den Ringstraßen Galerien, 1010 Wien, Kärntnerring 9-13/144 (Obergeschoß) (hyrja përballë hotelit Imperial).