Për çfarë mbetet të kujtohet viti 2021 në diasporë?

Përveç për pandeminë, e cila e ka mbajtur në ethe gjithë botën, viti 2021 i diasporës shqiptare do të mbahet mend edhe për disa arritje

Viti 2021 nga fillimi deri në fund u karakterizua me pandeminë që ka goditur mbarë globin, duke lënë shumë pasoja. Megjithatë, edhe në këto rrethana, diaspora shqiptare shënoi disa suksese, në fusha të ndryshme, ashtu siç pati edhe probleme dhe ngecje.

Në vazhdim, albinfo.ch bën një “bilanc” të arritjeve të diasporës, kryesisht asaj në Zvicër.

Njëri ndër sukseset më të mëdha ishte ai i Gjon Muharremajt (Gjon`s Tears), i cili zuri vendin e tretë në Eurovision, duke përfaqësuar Zvicrën.

Urimet për Gjonin, nga presidenti zviceran te yjet e muzikës 

Gjon Muharremaj shkëlqeu në mbrëmjen e Eurovisionit. Në vlerësimin e jurisë, mrekullia vokale e Freiburgut doli i pari. Me votimin e publikut, ai në fund zbriti në vendin e tretë dhe arriti një nga rezultatet më të mira për Zvicrën në të gjitha edicionet e deritashme të ESC.

Ky sukses gjithashtu e bëri krenare qeverinë e Zvicrës. Presidenti Federal, Guy Parmelin uroi Gjonin për fitoren në Twitter. “Performancë e shkëlqyeshme”, shkroi ai.

Dhe më tej: “Vendi i parë për jurinë dhe vendi i tretë për Zvicrën në këtë konkurs ndërkombëtar. Urimet e mia të përzemërta për Gjonin”.

Edhe Alain Berset nuk harroi të urojë të sapoardhurit nga Broc FR. Në historinë e tij në Instagram ai ndau një fragment nga videoja muzikore e baladës së Gjonit “Tout l’univers”.

“Bravo”, Berset komenton për performancën e shkëlqyeshme të fituesit të vendit të tretë në Eurovision Song Contest.

Sidoqoftë, nuk ndalet me dëshirat nga politika: Gjon Tears mund të presë me padurim një festë në qytetin e tij të lindjes Broc në rajonin e Gruyère gjatë verës.

Kryebashkiaku Claude Cretton i tha Keystone-SDA: Ne jemi duke pritur derisa rregullat e mbrojtjes nga Corona të lirohen, “në mënyrë që të kemi sa më shumë njerëz për të festuar”.

Eksperti për një kohë të gjatë i ESC, Sven Epiney shkruan në Instagram: “Kaq bukur”.

Nik Hartmann, entuziast në historinë e tij shkruan: “Edhe nëse ai nuk ka fituar tani, ia vlente të qëndronim zgjuar kaq gjatë.

Francine Jordi, e cila garoi në Eurovision Song Contest në 2002, është e kënaqur: “Çfarë arritje e pabesueshme. Faleminderit nga zemra ime”.

Bashkëprezantuesi i “Happy Day” Kiki Mäder mezi e duroi tensionin rreth njoftimit të renditjes dhe më në fund brohoritjet: “Urime”.

Prezantuesi i “10vor10” Arthur Honegger fillimisht uron grupin italian Måneskin, i cili zuri vendin e parë me “Hammer Song”. Pastaj ylli i SRF shton: “Dhe Zvicra kaq afër – e merituar”. Ngjarja, e shtyrë për një vit për shkak të Corona, ishte “ESC më emocionuese për një kohë të gjatë”.

Gjon’s Tears, “Performuesi më i mirë zviceran” në MTV EMA 2021 

Në mesin e fituesve të MTV Europe Music Awards 2021 ishte edhe artisti shqiptar, Gjon’s Tears, i cili fitoi çmimin “Performuesi më i mirë zviceran”.

Pas fitores së madhe, Gjon Muharremaj (emri i vërtetë) është shprehur i lumtur përmes një postimi në llogarinë e tij në Instagram.

“Performuesi më i mirë zviceran! Ne ia dolëm, faleminderit të gjithë njerëzve të mi dhe fansave që votuan për mua. Pa ju, do të kisha qëndruar në shtëpi, kështu që faleminderit për të gjitha. Faleminderit njerëzve që më mbështesin çdo ditë: Prindërve të mi, vëllait, gjyshit dhe grupit tim. Më keni bërë shumë të lumtur sot”, ka shkruar ndër të tjera Gjon. Kujtojmë që në këtë kategori ai ka garuar përkrah artistes tjetër shqiptare, reperes Loredana.

Shaqiri, në histori të Zvicrës 

Xherdan Shaqiri shkëlqeu për Zvicrën në fitoren 3:1 ndaj Turqisë në Euro 2020. Shaqiri shënoi dy gola mjaft të bukur. Ai është bërë lojtari i parë i Zvicrës që shënon shtatë gola në Kampionate Evropiane dhe Botërore. Me vetëm 29 vjet, Shaqiri theu një rekord në histori të futbollit zviceran. Gjithashtu Shaqiri është bërë futbollisti i vetëm zviceran, i cili ka shënuar në katër turne radhazi. Kupa e Botës 2014, Euro 2016, Kupa e Botës 2018 dhe Euro 2020.

Ai gjithashtu është vetëm futbollisti i katër evropian që shënon radhazi në katër turne madhore. Këtë rekord e arritën Cristiano Ronaldo, Romelu Lukaku dhe Ivan Perisiq. Shaqiri e përfundoi Evropianin me tre gola.

Diaspora e Kosovës e 3-ta në botë për dërgimin e parave në vendlindje 

Përmes një raporti të publikuar nga Banka Botërore është vënë në pah se diaspora nga Kosova ka zënë vendin e tretë në botë për dërgimin e remitancave në vendlindje. Ky raport i hartuar për vitin 2021 nënvizon të dhëna se nga periudha janar – gusht e këtij viti 860.4 milionë është vlera e remitancave të ardhura në Kosovë nga jashtë vendit për në Kosovë.

Prof. Dr. Omer Xhemali fiton çmimin për arsimin e mëtejmë të mjekëve të zemrës 

Prof. Omer Xhemali merr Çmimin SIËF për angazhimin e tij të veçantë në fushën e arsimit të mëtejshëm.

Ai është nominuar për këtë çmim nga praktikantët e tij, transmeton albinfo.ch një lajm të publikuar nga Spitali i Qytetit të Cyrihut “Triemli”.

Praktikantët, në këtë mënyrë kanë shprehur vlerësimin e tyre të lartë për cilësinë e trajnimit të tij të mëtejshëm dhe angazhimin e tij personal.

Xhemali me këtë rast shprehur veçanërisht i kënaqur: “Në vitin 2021, Klinika për Kirurgjinë Kardiake ka arritur statusin e kategorisë A të trajnimit të avancuar.

“Ky ishte dhe njëri nga qëllimet e mia kryesore në drejtim të edukimit të vazhdueshëm për kirurgët kardiakë të ardhshëm. Është shumë e rëndësishme për mua personalisht që të fitojmë kolegë të rinj për lëmin tonë të specializimit, përmes trajnimit të strukturuar dhe të përditshëm dhe që të na mundësohet t’i trajnojmë dhe mbështesim ata deri në ekzaminimin specialistik.

Për këtë arsye unë jam akoma më i kënaqur që mora çmimin SIËF përmes këtij nominimi anonim, përcjell albinfo.ch. Kjo më jep edhe më shumë forcë për të vazhduar në këtë rrugë”.

Çmimi SIWF, Das Schweizerische Institut für ärztliche Weiter- und Fortbildung (Instituti Zviceran për Edukim të të mëtejshëm në Mjekësi) jepet që nga viti 2014.

“Noma”, në pronësi të shqiptarit, sërish shpallet ‘Restoranti më i Mirë në Botë’ 

Edhe një herë, “Noma”, në pronësi të shqiptarit Rene Rexhepi, është shpallur “Restoranti më i Mirë në Botë”.

Njoftimin në Twitter e ka bërë vetë restoranti, duke konfirmuar këtë çmim. “Çfarë momenti i pabesueshëm për të gjithë ne në Kopenhagen. Ne jemi shumë të lumtur dhe krenarë që ekipi ynë është votuar restoranti numër 1 në botë”, thuhet në njoftim.

Çmimi i restorantit më të mirë në botë për vit është i pesti më radhë. Ditë më parë, ky restorant kishte marr 3 yje Michelin.

Rene Rexhepi është shqiptar nga Xhepçishti i Tetovës, ndërsa nëna e tij është nga Danimarka.

Shqiptarët u dalin në ndihmë gjermanëve pas vërshimeve: Na ndihmuan në luftë 

Lulzim Hajdaraj, bashkë me vëllain e tij, Gëzimin, udhëtuan nga Këlni drejt qytetit Bad Neunar të Gjermanisë për t’iu dalë në ndihmë personave që u dëmtuan jashtëzakonisht nga përmbytjet që kanë përfshirë Evropën.

Përmbytjet në Evropë kanë shkaktuar vdekjen e mbi 150 personave në Gjermani dhe kanë lënë të zhdukur mijëra të tjerë. Pas dëmeve jashtëzakonisht të mëdha, disa shqiptarë kanë shkuar në Bad Neunar për t’u dalë në ndihmë gjermanëve.

“Atje pamë që njerëzit ishin të frustruar dhe të habitur se si ekzistenca e tyre brenda një kohe aq të shkurtër kishte humbur tërësisht, qyteti ishte rrënuar pothuajse i tëri”, tha Hajdaraj në Facebook.

“Ne shkuam sadopak që t’u dalim në ndihmë atyre njerëzve që në kohën e vështirë që ne e përjetuam në luftë na ndihmuan dhe vazhduan të na ndihmojnë edhe sot”.

Ndër të tjerash, Hajdaraj bëri thirrje që secili që ka kohë dhe mundësi ta bëjë të njëjtën gjë, sepse është e duhur dhe e mirëpritur nga banorët.

Gerta Miftari, një nga personat me inteligjencën më të lartë në Gjermani 

Gerta Miftari është mërgimtarja shqiptare, e cila jeton dhe vepron në Gjermani. Ajo është shpallur nga Ministria e Arsimit në Gjermani si një nga personat me inteligjencën më të lartë në shtetin ku jeton.

Veçohet se një tregues i intelektit të saj është edhe fakti se ajo që prej moshës 12-vjeçare ka dhënë mësim. Për këtë pozicion ajo është rekomanduar nga mësuesit e saj, të cilët intelektin e saj e dalluan që në atë moshë.

Gerta Miftari, ndonëse është vetëm 16 vjeçe, ka botuar librin e saj të parë, i cili është rreth 400 faqe. Ky libër titullohet “Coldhearted mafía boss” dhe është një përzierje e zhanreve të krimit dhe romancës. Gertës i duhet edhe një vit për të përfunduar shkollën e mesme dhe më pas synon të vazhdojë studimet për drejtësi.

Edicioni i 71-të i Sanremos, Ermal Meta merr vendin e tretë 

Itali, në një mbrëmje të gjatë ku gjithçka ndryshoi në momentet e fundit, këngëtari shqiptar Ermal Meta zuri vendin e tretë në edicionin e 71 të Sanremos me këngën ‘Një milion gjëra për të të thënë’, shumë e pëlqyer nga publiku.

Vlen të theksohet se Maneskin janë fituesit e edicionit të 71 të festivalit Sanremo. Grupi i përbërë nga Damiano David, Victoria De Angelis, Thomas Raggi dhe Ethan Torchio fituan me këngën ‘Zitti e buona’. Në vendin e dytë u rëndit Fedez dhe Francesca Michielin me ‘Call me name’.

Në skenën e Ariston performuan live 26 këngëtarë, ndërkohë që kënga e Ermal Metës ishte një nga këngët pretendente për çmimin e parë.

Ermal Meta interpretoi me Orkestrën Mandolin të Napolit kryeveprën e Lucio Dalla-s, “Caruso” dhe fitoi edhe mbrëmjen e dueteve të Festivalit Sanremo 2021. Këngëtari, tashmë fitues i festivalit më 2018, i shoqëruar me Fabrizio Moro, i cili u rendit i pesti dhe në Eurovizion, u votua si më i miri nga orkestra.

Fitorja e Maneskin tërhoqi vëmendjne, pasi një grup roku nuk ka qenë shumë i shpeshtë në këtë festival.

 

 

 

---