Pas homazheve, varroset aktori Fadil Hasa

Vlerësime për aktivitetin e tij kanë dhënë edhe drejtues vendorë, deputetë si dhe figura të shquara të skenës shqiptare. 

Qindra qytetarë i kanë dhënë lamtumirën e fundit aktorit të mirënjohur të humorit Fadil Hasa. Homazhet në nderim të figurës së tij kanë nisur në orën 10:00 në hollin e teatrit “Aleksandër Moisiu”, ku aktorë nga e gjithë Shqipëria kanë bërë homazhe. Vlerësime për aktivitetin e tij kanë dhënë edhe drejtues vendorë, deputetë si dhe figura të shquara të skenës shqiptare.

Ish-regjisori i estradës së Durrësit, Haxhi Rama, është shprehur se me ikjen e Fadil Hasës ata kanë humbur diçka nga vetja e tyre. Për të kryer homazhe në Durrës ka qenë edhe ish-kryetari i PD-së, Sali Berisha, si dhe kryetari aktual, Lulzim Basha. Basha vlerësoi aktivitetin e Fadil Hasës, i cili bëri shqiptarët të buzëqeshnin në një kohë të errët.