Një termin për vizë në ambasadën gjermane shitet për 500 euro, reagon ambasada në Prishtinë

Terminet për aplikim për vizë në ambasadën e Gjermanisë shiten nga 500 euro

Qytetarët e Kosovës, të cilët kanë synuar të caktojnë në ambasadën e Gjermanisë një termin për aplikim për vizë pune, sot janë përballur me mosfunksionim e web-faqes së ambasadës për këtë çështje.

Ata kanë raportuar në KALLXO.com për mosfunksionimin e web-faqes së ambasadës dhe rrjedhimisht nuk kanë mundur të caktojnë termin.

Në pamundësi për të caktuar terminin online dhe duke mos pasur zgjidhje tjetër, qytetarët kanë gjetur “rrugë alternative”.

Ata kanë treguar se persona të caktuar u kanë ofruar termin porse për këtë u kanë kërkuar shumë të majme parash, përcjell Albinfo.ch.

Njëri prej tyre ka treguar se për sigurimin e terminit i janë kërkuar 500 euro.

Ofruesi i terminit i ka thënë qytetarit se në rast se sigurimi i terminit dështon atëherë paratë kthehen.

Ndërkohë, gjatë ditës është rregulluar web-faqja ku qytetarët mund të aplikonin për termin porse më nuk kishte termine të lira.

Disa qytetarë thonë se për të siguruar një termin për vizë gjermane, po u kërkohen nga 500 euro nga njerëz jashtë ambasadës.

 

Zyrtarisht, terminet për viza gjermane janë falas. Lidhur me këto pretendime, ka folur për Express, Ambasada Gjermane në Prishtinë.

Ambasada Gjermane në Prishtinë ka riktheksuar se caktimi i termineve është falas dhe nuk kanë ndonjë informacion ose rast konkret, për pretendimet e qytetarëve se në këmbim të 500 eurove u është ofruar sigurimi i një termini.

“Përkitazi me pagesat për temine: Deri tani askush nuk iu është drejtuar ambasadës lidhur me ndonjë rast konkret. Në rast të informatave konkrete, ne i shqyrtojmë të gjitha akuzat; mirëpo pa të dhëna/informata konkrete kjo fatkeqsisht nuk është e mundur. Në rast se ekzistojnë të dhënat konkrete, ne do t’ju ishim falënderues për një njoftim. Caktimi i termineve në Ambasadën Gjermane parimisht është falas”, thuhet në përgjigjen e ambasadës.

Historia me “shitje” të termineve për viza gjermane nga persona apo agjencioneve të paautorizuara nuk është e re.

Megjithatë, ambasada gjermane thotë se sistemi i saj nuk i lejon rezervimet e termineve nga dikush, për dikë tjetër, e kësisoj, sipas ambasadës, nuk mund të bëhen as shitjet e termineve.

“Në parim masat e sigurisë së sistemit dhe proceset e termineve të ambasadës e pengojnë rezervimin e termineve jo të personalizuara dhe me këtë edhe shitjen e tyre. Ndryshimet e mëvonshme të të dhënave për terminet e rezervuara gjithashtu nuk janë të mundura për të siguruar mbrojtjen e tyre nga keqpërdorimi”, përfundon ambasada.

 

---