Në Zvicër tubimi përkujtimor do të mbahet më 14 janar në Birr (AG), duke filluar nga ora 14:00. Mbështetës të këtij organizimi janë edhe Grupi Teatral «Aktrimi» Shoqata “Bashkimi” në Uster si dhe Ansambli “Trojet” nga Winterthur.
Në Danimarkë ndërkaq, në kuadër të shënimit të Ditës së Përkujtimit të Viktimave të Gjenocidit, do të shfaqet filmi dokumentar “Ploja në fushën e mëllenjave” të autorëve Blerina Këllezi Gazmend Bajri. Vlen të theksohet se bashkautorja e filmit, zonja Blerina Këllezi, është profesoreshë në Universitetin e Nottingham dhe ka punuar në Universitetin e Oxfordit në Britani të Madhe. Filmi i saj është vlerësuar shumë nga kritika dhe ajo ka fituar disa çmime ndërkombëtare për punën e saj.
Të përkujtojmë se viti 2024 shënon një çerek shekulli i gjenocidit mbi shqiptarët e Kosovës, të cilin e kanë zbatuar forcat serbe gjatë luftës së fundit.
Siç kemi bërë thirrje edhe më herët, shfrytëzojmë rastin që edhe njëherë të ftojmë institucionet qendrore e lokale të Kosovës, partitë politike, organizatat joqeveritare e të gjithë qytetarët, që këtë çerekshekull të gjenocidit mbi popullin tonë ta shënojmë në mënyrë sa më të dinjitetshme, duke treguar përgjegjësi të lartë shtetërore e qytetare.
Më 15 janar, pikërisht në ditën që Kuvendi i Kosovës e ka caktuar si ditën e përkujtimit të viktimave të gjenocidit, në sheshin „Skënderbeu“ në Prishtinë, aktivistët e Qendrës “Gjenocidi në Kosovë – Plagë eHapur” do të bëjnë ndezjen e qirinjve. Ftohen qytetarët e Prishtinës që të bashkëngjiten në këtë aktivitet.
Qytetarët e qyteteve tjera, me vetiniciativë mund ta bëjnë ndezjen e qirinjve në sheshet kryesore të qyteteve dhe të fshatrave të tyre.
Organizimi me vetiniciativë edhe i qytetarëve në qytetet jashtë kufijve të Kosovës është i mirëseardhur, andaj ftojmë të gjithë shqiptarët kudo që janë të bëjnë nderimin e viktimave të gjenocidit pikërisht më 15 janar 2024 nga ora 19:30.
Ata që nuk kanë mundësi të dalin në shesh, këtë ta bëjnë në ballkonet apo dritaret e tyre.
Po ashtu, ftojmë të gjithë shqiptarët anekënd botës që në ora 19:30, sipas kohës së tyre lokale, ta bëjnë ndezjen e qirinjve në ballkone e dritare në nderim të viktimave të gjenocidit në Kosovë.
Ftojmë gjithashtu organizatat joqeveritare, veçanërisht ato që në fokus të aktivitetit të tyre e kanë çështjen e viktimave të luftës që të bashkëngjiten në këtë aktivitet përkujtimi.
Përkujtimi i viktimave të Gjenocidit në Kosovë është më e pakta që ne duhet të bëjmë në rrugëtimin për ngadhënjimin e drejtësisë dhe ndëshkimin e krimit!
Me respekt për të gjitha viktimat e gjenocidit në Kosovë dhe për familjarët e tyre.
Gjenevë, 9 janar 2024
Qendra „Gjenocidi në Kosovë – Plagë e Hapur”
