Në fund të muajit prill, 327.308 persona ishin të papunë në Austri

Numri i personave të papunë në Austri ka pësuar rënie, pavarësisht luftës në Ukrainë

Në fund të muajit prill, 327,308 persona ishin të regjistruar si të papunë ose në ndonjë trajnim profesional. Saktësisht 254,755 ishin në kërkim të një pune, 72,553 duke përcjellë ndonjë trajnim nën përkujdesje të AMS (Enti i punësimit). Shkalla e papunësisë ishte 6.1 për qind, shkruan Ministria e Punës në një komunikatë për media, përcjell albinfo.at.

Për Ministrinë e Punës kjo është një bilanc pozitiv për muajin prill. Tërheqja e masave të koronës dhe efektet sezonale kanë siguruar dinamikë pozitive në tregun e punës.

Lufta në Ukrainë dhe sanksionet shoqëruese kundër Rusisë deri më tani kanë pasur vetëm një ndikim të kufizuar në zhvillimet e tregut të punës. Ministria ia atribuon rënien e lehtë nga fundi i muajit, kryesisht në mes të sezonit para verës në punësimin e punëtorëve në sektorin e gastronomisë, transmeton albino.at.

Nga ana tjetër, ka pasur një rritje të dukshme të njoftimeve paraprake për punë afatshkurtër në muajin prill. Në fund të muajit janë regjistruar 52 588 persona për punë me orar të shkurtër (Kurzarbeit).

---