Gruaja

Motrat Ferizi organizojnë gala mbrëmjen “Womalba” për nder të 8 Marsit

Për nder të ditës ndërkombëtare së gruas, 8 marsit, organizohet një mbrëmje festive në rajonin e Zvicrës frankofone, në Kantonin Vaud

E shtunë, 12 Shkurt 2022 - 21:40 Alisa Buzhala

Sukseset dhe sfidat gjatë integrimit në shoqërinë zvicerane dhe angazhimi i tyre ka bërë që gratë shqiptare të bashkohen si komunitet në zhvillimin e tyre nëpër sfera të ndryshme jetësore.

Për nder të ditës ndërkombëtare së gruas, 8 marsit, organizohet një mbrëmje festive në rajonin e Zvicrës frankofone, në Kantonin Vaud. Motrat Ferizi janë ato që e kanë organizuar këtë event, keshtu duke realizuar njëren nga dëshirat e tyre, duke pasur si qëllim kryesor paraqitjen e grave të suksesshme në Zvicër, angazhimin e tyre në shoqëri përmes punës, bizneseve të vogla dhe rritjes e zhvillimit të kulturës shqiptare në familje.

“Ne jemi rritur nga prindër shqiptarë dhe për ta ka qenë e domosdoshme që së pari ta flasim gjuhën shqipe në familje dhe pastaj të na shtyjnë përpara që të shkollohemi, të punojmë dhe të mos e ndjejmë veten të huaj këtu në Zvicër, po ashtu të qenët disa motra ka qenë privilegj sepse ne i kemi qëndruar pranë njëra-tjetrës dhe kemi punuar që secila të gjejë veten në shoqëri.

Nga kjo ka ardhur ideja e organizimit të një mbrëmje sepse mendojmë që këtu ka shumë femra shqiptare që kanë thyer stereotipe sa i përket integrimit në Zvicër. Kemi takuar shumë vajza të reja që shkollohen e gra që punojnë dhe për ne është e rëndësishme që këtë festë t’a festojmë duke u përpjekur që t’i rrisim bizneset tona dhe duke u mburrur me sukseset” – kanë thënë për albinfo.ch motrat Ferizi, organizatoret e Womalba.

Më shumë se vetëm një festë, e veçanta e këtij eventi do të jetë që do të ketë një program inspirues me fjalime nga disa të ftuara speciale, lojë shpërblyese nga bizneset e vet themeluara nga gratë, një darkë speciale për të gjithë mysafirët dhe muzikë me këngëtaren njohur Leta dhe DJ Toni R

Mbrëmja është e hapur për të gjitha gratë, duke filluar nga mosha 16 vjeçe. Për rezervime kontaktoni organizatoren në numrin: +41 79 942 32 05 poashtu në rrjetin social instagram: Womalba.