Mbrëmja AlbGala e platformës mediale albinfo.ch, një përjetim i paharrueshëm

Në një atmosferë solemne, me ambient të ngrohtë e miqësor, platforma mediale Albinfo.ch ka mbajtur mbrëmë në Cyrih mbrëmjen AlbGala të fundvitit.

Aktivitetin e kanë nderuar me pjesëmarrjen e tyre edhe krerët e përfaqësive diplomatike nga hapësirat shqiptare, pastaj politikanë shqiptarozviceranë si dhe shumë aktivistë kulturorë, shoqërorë e sportivë, shqiptarë e zviceranë.

Kanë marrë pjesë edhe një numër i njerëzve nga biznesi, partnerë afaristë të Albinfo.ch, te cilët kanë merita të mëdha për mbarëvajtjen e platformës. Në këtë mbrëmje, siç është bërë tashmë traditë, janë ndarë edhe çmimet për Personalitetin e Vitit 2024, në gjashtë fusha të ndryshme, të cilët me arritjet e tyre kanë shënuar vitin 2014 në komunitetin shqiptar të Zvicrës.

Kështu, çmimin për angazhim shoqëror dhe humanizëm e ka merituar veprimtarja e njohur humaniste nga Cyrihu, Valdete Hoti.

Për politikë, Florian Haçkaj, veprimtar dhe afarist ndërsa për Sport, Albinfo.ch ka vlerësuar me çmimin përkatës, arbitrin e njohur të niveleve ndërkombëtare, Bekim Zogaj.

Personalitet i Vitit 2024 për sektorin e biznesit është zgjedhur afaristi i njohur nga Zvicra frankofone, pronari i kompanisë Greenhouse, Nazmi Mehmetaj.

Për kulturë, gjegjësisht për muzikë, çmimi ka shkuar në duart e këngëtarit të suksesshëm të muzikës rap, Arbër Rama (EAZ).

Personaliteti i Vitit 2024 për mjekësi është shpallur mjeku i shquar, neurokirurgu dhe profesori universitar, Edin Nevzati.

Për atmosferë të këndshme të mbrëmjes janë kujdesur pianistja Kristina Martini si dhe Florent Abrashi me bendin e vet, të ardhur nga Prishtina.

Aktiviteti është mbajtur në ambientet e restorantit modern Letzigrund të vëllezërve Kqira në Cyrih, të cilët kanë mirëpritur dhe gostitur me profesionalizëm dhe me ushqime të përgatitura e të shërbyera me dashuri.

Një mbrëmje e paharrueshme për rreth 200 mysafirët e mbrëmjes Gala, të organizuar nga platforma mediale Albinfo.ch.

---