Marrëveshje në mes të dy asociacioneve biznesore

Marrëveshja është lidhur në mes të kryetarit të Odës Ekonomike Zvicër-Kosovë, Stefan Sarkani dhe kryetarit të të Rrjetit të Biznesit Shqiptar në Zvicër, Fehmi Fetahu

Të premten, në lokalet e Ambasadës së Kosovës në Bernë është nënshkruar një marrëveshje bashkëpunimi në mes të Rrjetit të Bizneseve Shqiptare të Zvicrës dhe Odës Ekonomike Zvicër Kosovë. Këto dy asociacione si fushë veprimi kanë bashkimin e bizneseve shqiptare dhe atyre zvicerane në Zvicër me qëllim bashkëpunimi dhe investimi në Kosovë respektivisht edhe në trojet tjera shqiptare.

“Marrëveshja e nënshkruar e bashkëpunimit ka për qëllim të realizojë të gjitha çështjet tregtare, bankare, të tundshmërisë dhe të patundshmërisë, drejtimin dhe administrimin e kontratave afariste që kanë të bëjnë me shitjen, importin dhe eksportin e mallrave, si dhe të gjitha operacionet tregtare dhe financiare”, thuhet veç tjerash në tekstin marrëveshjes që e ka siguruar albinfo.ch.

Marrëveshja për bashkëpunim është lidhur në mes të kryetarit të “Odës Ekonomike, të Industrisë dhe Shërbimeve Zvicër-Kosovë në njërën anë, Stefan Sarkani dhe kryetarit të të “Rrjetit të Biznesit Shqiptar në Zvicër,  Fehmi Fetahu, nga ana tjetër, në praninë dhe mbështetjen e ambasadorit të Republikës së Kosovës në Zvicër, Naim Malaj.

Me këtë marrëveshje këto dy asociacione synojnë ngritjen e bashkëpunimit në nivel më të lartë dhe fuqizimin e rolit të tyre në drejtim të përmbushjes së synimeve të tyre të përbashkëta.