Konsulli Berisha bën bashkë komunitetet fetare dhe klerikët shqiptarë në Zvicër

Konsulli i Kosovës në Cyrih, Vigan Berisha: Roli i komuniteteve fetare në ruajtjen e gjuhës dhe kulturës shqiptare në diasporë është i pazëvendësueshëm

Me rastin e Ditës Ndërkombëtare të Tolerancës, Konsullata e Republikës së Kosovës në Cyrih organizoi një takim të rëndësishëm me përfaqësues dhe klerikë të komuniteteve fetare shqiptare në Zvicër. Ky takim u mbajt me qëllim forcimin e unitetit dhe ruajtjen e identitetit kombëtar, duke bashkuar figurat kryesore të komunitetit mysliman dhe katolik shqiptar në Zvicër, si dhe duke promovuar tolerancën dhe bashkëpunimin ndërmjet feve.

Në këtë ngjarje morën pjesë figura të njohura të komuniteteve, Mehas Alija, Kryetar i Komunitetit Mysliman në Zvicër, dhe Don Anton Uka, përfaqësues i Misionit Katolik Shqiptar. Të pranishëm ishin edhe si dhe përfaqësuesit: Don Marjan Marku, Don Marjan Demaj, Fehim Abazi, Halil Avdulli dhe Pashk Çeta.

Konsulli i Republikës së Kosovës, z. Vigan Berisha, në fjalën e tij përshëndetëse gjatë takimit me përfaqësuesit dhe klerikët e komuniteteve fetare shqiptare në Zvicër, vlerësoi rolin e tyre të pazëvendësueshëm në ruajtjen e unitetit dhe identitetit kombëtar.

“Konsullata jonë do të mbetet gjithmonë një derë e hapur për çdo nismë që synon të forcojë unitetin, bashkëpunimin dhe ruajtjen e identitetit tonë kombëtar,” deklaroi ai, duke theksuar se roli i komuniteteve fetare është i një rëndësie të veçantë në ndërtimin e urave të solidaritetit dhe në edukimin e brezave të rinj me vlera kombëtare e njerëzore.

Konsulli Berisha vuri në pah rëndësinë e bashkëpunimit ndërmjet institucioneve dhe komuniteteve fetare për të ruajtur gjuhën dhe kulturën kombëtare, duke veçuar mësimin plotësues në gjuhën shqipe si një shtyllë kryesore të këtij misioni. “Mësimi në gjuhën shqipe jo vetëm që ndihmon fëmijët tanë të njohin rrënjët e tyre, por gjithashtu garanton që gjuha jonë e bukur të mbetet e gjallë në brezat e ardhshëm, përballë sfidave të asimilimit”, theksoi ai.

Në vijim, Konsulli theksoi rëndësinë e bashkëpunimit dhe të harmonisë ndërmjet komuniteteve fetare shqiptare, si një model që përçon mesazhe të fuqishme uniteti. “Në një botë ku ndarjet shpesh i tejkalojnë kufijtë kulturorë dhe fetarë, është jetike që mërgata jonë të dëshmojë se bashkimi është çelësi i suksesit. Roli juaj, si udhëheqës shpirtërorë, është i një rëndësie të madhe në këtë drejtim”, u shpreh ai.

Berisha përmbylli fjalën e tij duke shprehur mirënjohje për përpjekjet e palodhshme të klerikëve në shërbim të komunitetit shqiptar në Zvicër. “Ju falënderoj për përkushtimin tuaj dhe për rolin që luani në forcimin e unitetit tonë kombëtar dhe shpirtëror. Ky takim le të jetë një hap i rëndësishëm drejt bashkëpunimit edhe më të ngushtë në të ardhmen. Gjithmonë do të keni mbështetjen tonë në misionin tuaj fisnik për të ruajtur gjuhën, kulturën dhe traditat tona,” përfundoi Konsulli, duke uruar suksese të përbashkëta.

Mehas Alija, Kryetar i Komunitetit Mysliman në Zvicër, theksoi se në Ditën Ndërkombëtare të Tolerancës, fetë janë burimi kryesor i frymëzimit për të promovuar mirëkuptimin dhe harmoninë ndërfetare e ndërnjerëzore. Ai vlerësoi takimin e organizuar nga Konsulli i Kosovës, z. Vigan Berisha, si një hap të rëndësishëm drejt forcimit të bashkëpunimit mes prijësve fetarë shqiptarë në Zvicër.

Alija nënvizoi rëndësinë e ruajtjes së vlerave kombëtare, gjuhës dhe identitetit, duke shërbyer si model bashkimi për shqiptarët, veçanërisht në Ballkan. Ai theksoi gjithashtu domosdoshmërinë e projekteve të përbashkëta dhe bashkëpunimit me komunitete të tjera, për të forcuar identitetin fetar dhe kombëtar, duke qenë shembull i qytetërimit dhe harmonisë.

Don Anton Uka, përfaqësues i Misionit Katolik Shqiptar në Zvicër, e vlerësoi takimin e organizuar më 18 nëntor në Konsulatën e Kosovës në Zvicër si shumë të frytshëm dhe me domethënie të veçantë. Ai falënderoi Konsullin, z. Vigan Berisha, për organizimin në kuadër të Ditës Botërore të Tolerancës, duke theksuar se ky takim shërbeu për t’u njohur më mirë si individë dhe si institucione fetare katolike dhe myslimane.

Uka nënvizoi se trashëgimia dhe historia kombëtare shqiptare janë unike në botë dhe se për shqiptarët, toleranca shkon përtej saj, duke u shndërruar në një vëllazëri të vërtetë. “Edhe pse të ndarë në religjione, historia jonë ka treguar se kjo nuk është pengesë për bashkëpunim. Përkundrazi, është një mundësi për të forcuar lidhjet tona dhe për të shërbyer më mirë komunitetin shqiptar që jeton dhe vepron në Zvicër,” përfundoi ai.

Pashk Çeta, përfaqësues nga Misioni Katolik  i Shqiptarëve në Zvicër në Argau dhe pasardhës i pajtuesit të njohur të gjaqeve, Anton Çeta, theksoi veçantinë e Misionit Katolik Shqiptar në Zvicër, duke vënë në dukje se përveç meshave që mbahen në gjuhën shqipe, ky mision organizon edhe aktivitete kulturore, si grupet artistike të vallëzimit. Në Luzern, funksionon Grupi i Vallëzimit “Shqiponja”, ku marrin pjesë anëtarë të çdo moshe, ndërsa në Thurgau është Grupi i Vallëzimit “Arbëreshët”, i njohur për përgatitjen e tij të shkëlqyer. Po ashtu, në Aarau, grupi i vallëzimit është në fazën e organizimit dhe përgatitjes. Këto aktivitete, sipas Çetës, janë një dëshmi e angazhimit të Misionit Katolik i Shqiptarëve në Zvicër për ruajtjen e traditave dhe kulturës shqiptare në diasporë.

Takimi në Konsullatën e Republikës së Kosovës në Cyrih, me rastin e Ditës Ndërkombëtare të Tolerancës, theksoi rëndësinë e bashkëpunimit ndërmjet komuniteteve fetare shqiptare në Zvicër. Fjalët e Konsullit Vigan Berisha dhe përfaqësuesve të tjerë riafirmuan angazhimin për ruajtjen e identitetit kombëtar dhe kulturor, si dhe për forcimin e solidaritetit dhe harmonisë ndërmjet shqiptarëve në diasporë. Ky takim ishte një hap i rëndësishëm drejt një bashkëpunimi të ngushtë dhe një modeli uniteti dhe tolerancë ndërkulturor.

Foto: Xhelal Simixhiu

---