“Kikiriki-shqip me fëmijët”, emisioni që promovon gjuhën amtare

“Kikiriki-shqip me fëmijë” është emision gjithëpërfshirës në gjuhën amtarë, ku fëmijët shqiptarë nga gjithë bota mund të bëhen lehtësisht pjesë e tij duke na u bashkuar si reporterë të jashtëm”

Prindërit shqiptarë, të cilët i lindin fëmijët në Austri, kanë një dëshirë të përbashkët: T’u mësojnë atyre gjuhën amtare shqipe, pasi është pjesë e identitetit tonë. Përveç të tjerash, një fëmijë që flet dy ose tri gjuhë, ka gjasa të bëhet më inteligjent kur rritet. Por cilat janë disa mënyra për tu mësuar gjuhën e nënës?

Desara Gjonej ka nisur një iniciativë shumë interesante. Ajo ka krijuar një program argëtues në radio që quhet “Kikiriki-shqip me fëmijë“. Nisma e saj në radion austriake “ Radio Orange” është vullnetare, ndërsa emisioni përgatitet në ambientet e Ambasadës Shqiptare në Vjenë bashkë me fëmijët shqiptarë që jetojnë këtu.

Desara Gjonej, u lind në Shkodër, ndërsa jeton në Austri prej 25 vjetësh. Ajo është autore dhe bashkautore e disa librave të mësimit të gjuhës shqipe, në bashkëpunim me shtëpi botuese austriake dhe gjermane. Sot, punon si mësuese në një shkollë shtetërore në Vjenë, ku shoqëron fëmijët nga klasa e parë në të katërtën.

Çfarë përmban “Kikiriki-shqip me fëmijë”

Gjatë bisedës sonë ajo thotë: “Me fëmijët shqiptarë në Vjenë flasim shqip në radio, përsërisim dhe mësojmë fjalë sipas temave të ndryshme gjatë vitit dhe krijojmë fjalorin e parë në botë shumëgjuhësh në radio: shqip-gjermanisht-anglisht. Emisioni ka rubrika të ndryshme, si për shembull, intervista, barcaleta, kuriozitete, tregime, gjëegjëza, recitime dhe këngë. Pra, çdo gjë që ka lidhje me botën e fëmijëve. “Kikiriki-shqip me fëmijë” është emision gjithëpërfshirës, ku fëmijët shqiptarë nga e gjithë bota mund të bëhen lehtësisht pjesë e tij, duke na u bashkuar si reporterë të jashtëm.

Në faqen tonë të internetit www.ejamene.com mund të lexoni se si mund të bëheni pjesë e emisionit tonë. Aty gjeni edhe fletë pune dhe lojëra online, që krijohen enkas për emisionin përkatës. Hyrja në faqen tonë dhe përdorimi i materialeve për mësim është falas”, sqaron ajo për albinfo.at.

Kjo nismë e Desarës më pëlqeu jashtë mase, duke qenë se jam prind vetë dhe dëshiroj patjetër që vajza ime të edukohet në gjuhën e nënës. Për më tepër është për t’u vlerësuar që ky emision edukativ mund të dëgjohet pa pagesë.

Gjuha amtare po bëhet gjuhë e dytë ose e tretë!

Emisioni transmetohet një herë në muaj në “Radio Orange” në frekuencat 94.0, por mund të dëgjohet dhe onlinë në website www.ejamene.com.

“Ka tashmë statistika që tregojnë se gjuha që përdorin fëmijët shqiptarë, kur luajnë me motra dhe vëllezër zakonisht është gjuha e vendit ku jetojnë. Gjithashtu filmat që shohin fëmijët, librat që lexojnë, kurset që ata ndjekin janë gjithnjë e më shumë në një gjuhë tjetër dhe jo në shqip. Në të vërtetë, gjuha amtare e fëmijëve tanë po kthehet për ata në një gjuhë të dytë, nganjëherë në një të tretë. Për ta kultivuar gjuhën nuk mjafton vetëm të folurit shqip në shtëpi”, shpreh shqetësimin e saj, krijuesja e emisionit “Kikiriki-shqip me fëmijë“.

E pyetur nga albinfo.at, për disa sugjerime se si t’u mësojmë fëmijëve shkrim e lexim në gjuhën tonë, edhe pse kushtet duken të vështira, ajo shprehet: “Unë jam vetë nënë e dy fëmijëve dhe natyrisht e njoh mirë problematikën e kësaj çështjeje. Duke u nisur nga përvoja ime si nënë dhe si mësuese, prindërve u këshilloj tri gjëra që unë personalisht i kam shumë për zemër:

1. Flisni shqip me fëmijët kudo që jeni dhe mos kini “turp” të flisni edhe në publik një ndër gjuhët më të vjetra në botë.
2. Regjistrojini dhe shoqërojini fëmijët në kurset për mësimin e gjuhës shqipe në komunitetin shqiptar. Më besoni, atje fëmijëve u shndrisin sytë!
3. Flisni në shtëpi në dialektin tuaj me fëmijët, por nxitini ata të flasin dhe të shkruajnë në shkollë edhe në gjuhën e njësuar shqipe”.

Gjuha mësohet më së miri nëpërmes lojërave

Një tjetër mënyrë është mësimi i Abetares së gjuhës shqipe në klasën e parë në kurset që ofrohen në shkollat shtetërore të Austrisë. Mësimi zhvillohet një herë në javë paradite në klasë ose pasdite, sipas numrit të regjistrimeve. Megjithatë, mënyra më e kënaqshme për fëmijët për të mësuar është nëpërmjet lojërave. Prandaj, i ftojmë të gjithë lexuesit tanë të mbështesin nismë dhe t’i bëjnë fëmijët dëgjues të rregullt të emisionit “Kikiriki-shqip me fëmijë“.

Në përfundim të bisedës, Desara tha: “Gjuha shqipe është pjesë e identitetit të fëmijëve tanë. Le t’ua dhurojmë atyre këtë thesar të çmuar. Një njeri me identitet të fortë, ka rrënjë të thella si një lis i moçëm dhe njëkohësisht është i lirë si një shqiponjë”.

box

 Pas komunikimit me Desarën, s`ka si të të mos kujtohet poezia e famshme e Gjergj Fishtës që thotë: “Pra, mallkue njai bir Shqyptari, qi këtë gjuhë të Perëndis’, trashigim që na la i Pari, trashigim s’ia len ai fmis; edhe atij iu thaftë, po, goja, që përbuzë këtë gjuhë hyjnore; qi n’gjuhë t’huej, kur s’asht nevoja, flet e t’veten e lèn mbas dore”. 

---