Hahn në Tiranë thotë se nuk ka kushte të reja për Shqipërinë 

Hahn tha se kjo fazë përgatitore do të jetë shumë kërkuese nga të dyja palët qoftë nga ana e Shqipërisë, qoftë nga ana e BE.

Komisionari për zgjerim, Johanes Hahn ka zhvilluar një takim me kryeministrin Edi Rama dhe anëtarët e qeverisë, ku është prezantuar procesi përgatitor për hapjen e negociatave për anëtarësim me Bashkimin Evropian. Ai më pas është takuar edhe me Presidentin Meta.   Gjatë fjalës së tij, kryeministri Edi Rama tha se puna përgatitore për negociatat nuk do jetë e lehtë, ndërsa qeveria ka lexuar me vëmendje konkluzionet e KE. Sipas kryeministrit, rruga e Shqipërisë drejt BE është e pakthyeshme.

Ndërsa komisionari Hahn ka folur edhe për procesin e vettingut, ku shprehur rezerva për mungesën e gjyqtarëve.

“Ky do të jetë fokusi ynë dhe detyra që shtrihet para jush në muajt që vijim është që të vazhdoni të jepni rezultate në mënyrë që të tejkaloni çdo dyshim të mbetur. Shteti i së drejtës është diçka që shihet me kujdes nga shtetet anëtare të BE. Vettingu duhet të vijojë së bashku me ristrukturimin e pritshëm institucional dhe krijimin e  institucioneve të reja që parashikohen nga reforma kushtetuese e 2016”, ka thënë ai.

Hahn tha se kjo fazë përgatitore do të jetë shumë kërkuese nga të dyja palët qoftë nga ana e Shqipërisë, qoftë nga ana e BE. Ai vuri theksin tek personeli, për të cilin tha se duhet të shtohet dhe të jetë i kualifikuar.

“Nuk po fusim asnjë kusht të ri, ajo që po bëjmë është një proces i cili është zhvilluar në çdo vend tjetër kandidat. Sepse në fillim të këtij procesi na duhet të identifikojmë ku qëndron vendi në legjislacionin e vet krahasuar me legjislacionin evropian”, përfundoi ai.

 

---