Getoar Hoxha: Një triumf për Kosovën në botën e Stomatologjisë

"Jam shumë i lumtur që mundi dhe sakrifica u shpërblyen në mënyrën më të mirë të mundshme. Për mua është hapur një diapazon tjetër i fushës së veprimit dhe të ëndërrimit"

Në një moment historik për Kosovën dhe botën e Stomatologjisë, studenti i talentuar i stomatologjisë, Getoar Hoxha është shpallur studenti më i mirë në botë për vitin 2024 nga Global Institute for Dental Education (GIDE) në fushën e Implantologjisë dhe rigjenerimit kockor. Ky lajm i jashtëzakonshëm vjen pas përfundimit të Masterit Klinik në Los Angeles, California, ku Hoxha ka dalë triumfues në një program të njohur ndërkombëtarisht.

Pas publikimit të lajmit, albinfo.ch ka zhvilluar një intervistë ekskluzive me Getoarin

Albinfo: Jeni zgjedhur studenti më i mirë  në botë për vitin 2024 nga Global Institute for Dental Education (GIDE) në fushën e Implantologjisë dhe rigjenerimit kockor, si e përjetuat këtë ndjesi?

Getoar Hoxha:  “Fillimisht jam ende duke e procesuar të gjithën se çfarë ka ndodhur. Ta fitosh vendin e parë në një konkurrencë aq të fortë me kolegë të talentuar nga Australia, Kina, Evropa dhe Amerika vërtetë është një emocion shumë i fuqishëm. Jam shumë i lumtur që mundi dhe sakrifica u shpërblyen në mënyrën më të mirë të mundshme. Për mua është hapur një diapazon tjetër i fushës së veprimit dhe të ëndërrimit.

Albinfo: Mund të na tregoni më shumë rreth përvojës suaj në Masterin Klinik në Los Angeles? Çfarë është më e veçante për këtë program dhe si ndihmoi në formimin e njohurive dhe aftësive tuaja në implantologji dhe rigjenerim kockor?

Getoar Hoxha: Përvoja ime në Masterin Klinik ka qenë një nga më të mirat në aspektin profesional. Jam shumë i lumtur që kam pasur mundësinë të avancoj në këtë program. E veçanta e tij është se mentorët na kanë udhëhequr gjatë gjithë vitit, duke ndarë eksperiencat e tyre shumëvjeçare në procedura që shpesh janë të rralla në vendin tonë. Një nga mësimet kryesore që kam marrë është se dështimet janë pjesë e procesit; është e rëndësishme të mos demoralizohemi, por të mësojmë prej tyre.

Albinfo: Si e vlerësoni rolin e Global Institute for Dental Education (GIDE) në arritjen e këtij suksesi? Cilat ishin disa nga mësimet më të rëndësishme që keni marrë gjatë studimeve atje dhe si kanë ndikuar ato në praktikat tuaja?

Getoar Hoxha: GIDE është një institucion që e rekomandoj me ngulm për çdo person që dëshiron të avancojë në këtë fushë. Gjatë vitit, kam aplikuar mësimet e marra në GIDE dhe ato kanë qenë të dobishme për mua dhe për pacientët që shërbej. Njohuritë dhe aftësitë e fituara atje më kanë ndihmuar të rritem si profesionist.

Albinfo: Çfarë sfidash hasët gjatë rrugëtimit tuaj akademik dhe profesional? Si i përballuat ato dhe çfarë mësimesh nxorët nga ato eksperienca?

Getoar Hoxha: Çdo rrugëtim ka sfidat e tij, dhe ky nuk bën përjashtim. E para, është e vështirë të menaxhosh kohën, pasi duhet të jesh larg klinikave dhe familjes. E dyta, kostot e programit janë të larta, veçanërisht kur i krahasojmë me të ardhurat në Kosovë. Megjithatë, këto sfida më kanë kalitur si profesionist dhe më kanë mësuar se gjithçka është e mundur me punë të palodhur.

Albinfo: Cili ka qenë burimi juaj i frymëzimit në fushën e stomatologjisë? A keni pasur ndonjë mentor që ka ndikuar në zgjedhjet tuaja profesionale?

Getoar Hoxha: Të kesh mentorë nga liderët e implantologjisë dhe rigjenerimit kockor është një privilegj. Mësimi nga më të mirët është një thënie që më ka ndjekur gjatë gjithë karrierës sime. Një nga mentorët e mi të parë ishte Dr. Besart Kondirolli, që më ofroi mundësinë të filloj karrierën time në klinikën e tij.

Albinfo: Si e shihni ndikimin e suksesit tuaj në komunitetin e stomatologëve në Kosovë? Çfarë mesazhi do të jepni për ata që ndjekin të njëjtën rrugë?

 Getoar Hoxha: Suksesi im është gjithashtu një sukses për vendin tonë. Besoj se është në interesin e të gjithëve që Kosova të përfaqësohet denjësisht në arenën ndërkombëtare. Duhet të festojmë arritjet e njëri-tjetrit.

Albinfo: Cila do të ishte këshilla juaj për studentët e rinj që dëshirojnë të ndjekin një karrierë në Stomatologji? Çfarë rëndësie ka përkushtimi dhe puna e palodhur në këtë profesion?

Getoar Hoxha: Përkushtimi dhe puna e palodhur janë thelbësore. Ky profesion kërkon një angazhim të jashtëzakonshëm, si fizik ashtu edhe psikik. Nëse dëshironi ta ndiqni këtë rrugë, punoni shumë dhe mos u frikësoni nga dështimet. Ato janë pjesë e procesit.

Albinfo: Me dy klinika që drejtoni, si arrini të balanconi angazhimet tuaja profesionale me jetën personale? A ka ndonjë strategji që ndihmon në menaxhimin e stresit dhe kohës?

Getoar Hoxha: Familja është mbështetje kryesore në këtë rrugëtim. Edhe pse kërkohet shumë punë, është e rëndësishme të prioritetizoni momentet me ata që doni. Më mbushin energji dhe më ndihmojnë të përballoj stresin e punës.

Albinfo: Çfarë plane keni për të ardhmen tuaj në Stomatologji? A ka ndonjë projekt të veçantë që dëshironi të zhvilloni ose ndonjë fushë tjetër që dëshironi të eksploroni?

Getoar Hoxha: Kam disa projekte që po shpresoj t’i realizoj, duke përfshirë mundësinë e të qenit mentor në GIDE. Gjithashtu, kam interes të eksploroj rehabilitimin e pacientëve me padhëmbësi totale duke përdorur implantime dentare me anestezi të përgjithshme.

Albinfo: Si e përshkruani rolin e bashkëpunimit dhe punës në ekip në fushën e Stomatologjisë? A keni ndonjë histori që ilustron rëndësinë e punës ekipore në arritjet tuaja?

Getoar Hoxha: Bashkimi bën fuqinë, dhe ky është një parim që kam përjetuar në klinikat ku punoj. Kam pasur fatin të kem një ekip të jashtëzakonshëm, dhe çdo sukses që kam arritur është rezultat i punës sonë të përbashkët.

Albinfo: Si e ndjeni lidhjen tuaj me traditat dhe kulturën e Kosovës në kontekstin e punës suaj? Çfarë domethënie ka për ju të jeni një stomatolog i suksesshëm nga Kosova dhe si ndihmon kjo në promovimin e profesionit në nivel ndërkombëtar?

Getoar Hoxha: Si një vend i vogël, ne kemi shumë sfida për të arritur në arenën ndërkombëtare. Çdo sukses duhet të na bëjë krenarë, sepse tregojmë se kemi profesionistë të aftë dhe të dedikuar. Jam krenar që po kontribuoj në promovimin e Kosovës edhe në këtë fushë.

Në përfundim të kësaj interviste, Getoar Hoxha shfaqet si një yll në ngjitje në botën e stomatologjisë, pas shpalljes si studenti më i mirë në botë për vitin 2024 nga Global Institute for Dental Education (GIDE). Suksesi i tij është një dritë shprese për profesionin në Kosovë, duke ilustruar se përkushtimi dhe pasioni mund të shpërblehen në mënyrë të jashtëzakonshme. Me vizione të guximshme për të ardhmen, përfshirë mentorimin në GIDE dhe rehabilitimin e pacientëve, Getoari tregon se çdo arritje është një hap përpara për të gjithë ata që ëndërrojnë të arrijnë majat. Ai është një shembull frymëzues se si talenti dhe puna e palodhur mund të krijojnë një ndikim të qëndrueshëm në fushën e Stomatologjisë, duke ndihmuar në ndërtimin e një imazhi dinjitoz për Kosovën në arenën ndërkombëtare.

 

 

 

---