FIFA nis hetimet për provokimin me flamurin serb

Federata e Futbollit e Kosovës FFK tashmë ka kërkuar nga FIFA që të sanksionojë serbët

FIFA ka nisur hetimet për flamurin me motiv nacionalist nga kabina e lojtarëve të Serbisë në Botërorin që po zhvillohet në Katar. Ai flamur paraqet hartën e Kosovës nën ngjyrat kombëtare serbe, transmeton albinfo.ch. Fotoja me sa duket është bërë në dhomën e zhveshjes para ndeshjes së Serbisë kundër Brazilit.

Asnjëri nga lojtarët nuk shihet në dhomë, por flamuri është i varur mbi bluzat dhe dollapët e mbrojtësit Milos Veljkovic (Werder Bremen) dhe mesfushorit Andrija Zivkovic (PAOK Saloniki), shkruan spiegel.de.

Një zëdhënës i FC Werder tha për “Deichstube” se Veljkovic kishte dëgjuar për foton vetëm pas ndeshjes. Kur lojtarët u kthyen në dhomën e zhveshjes, aty nuk ishte më flamuri i varur.

Po ky flamur është parë pastaj edhe në tribuna, në duar të publikut serb.

Kosova kërkon sanksione për flamurin në kabinën e Serbisë

Federata e Futbollit e Kosovës FFK tashmë ka kërkuar nga FIFA që të sanksionojë serbët, transmeton albinfo.ch. “FFK-ja dënon fuqishëm veprimet agresive të Serbisë kundër Republikës së Kosovës në Kupën e Botës 2022”, ka shkruar federata në Twitter.

---