Festojnë 7 Marsin: Inkurajohen mësuesit të vazhdojnë tutje

Naser Ulaj është mësues në kantonin e Cyrihut që nga viti 1993.

Mësuesi me origjinë nga Kosova është nga ata të paktët mësimdhënës të shkollës shqipe në Zvicër që nuk punon diçka tjetër përpos punës me nxënës të mësimit plotësues.

Për të festuar ditën e 7 Marsit, po edhe 8 Marsin, Naser Ulaj këtë herë në cilësinë e kryetarit të LAPSH-it për Kantonin e Cyrihut kishte mbledhur bashkë të dielën kolegët e tij dhe prindërit me nxënësit në Schlieren.

7 Marsi në diasporë ka një domethënie të madhe për mësuesin Ulaj, po edhe për fëmijët tanë që po rriten jashtë atdheut të tyre.

Sa i përket organizimit të mësimit të gjuhës amtare, Ulaj thotë të ketë përmirësime, por jo edhe rritje të numrit të nxënësve që vijojnë shkollën shqipe.

„Ka ndryshime, sidomos sa i përket informimit. Ne më herët është dashur të trokasim çdo derë e t’i njoftojmë se fuksionon shkolla shqipe në Zvicër. Sot ka ende vështirësi, ngase prindërit hezitojnë t’i dërgojnë fëmijët e tyre për mësimin plotësues të gjuhës amtare. Edhe pse Kantoni i Cyrihut është më i madhi në Zvicër, përqindja e përfshirjes së nxënësve në shkollat shqipe është jo e kënaqshme», tha Ulaj.

Ai është një nga 10 mësuesit shqiptarë që japin mësim në 56 pika shkollore që funksionojnë në gjithë Kantonin e Cyrihut.

Komunitetet e tjera qëndrojnë më mirë sa i përket mësimit plotësues, ngase kanë përkrahjen e shteteve të tyre, mendon mësuesi Ulaj.

Ai ka një mesazh për prindërit.

«Prindërit duhet të vetëdijesohen dhe të shohin se e vetmja armë për mosasimilimin e fëmijëve të tyre është mësimi i gjuhës amtare dhe kontakti me kulturën e atdheut. Edhe mësuesit zviceranë të gjermanishtes kanë argumetuar këtë, duke testuar nxënësit që vijojnë mësimin e gjuhës shqipe dhe ata cilët nuk e vijojnë. Ne duhet t’i marrim shembull grekët, që 100 për qind vijojnë mësimin plotësues në gjuhën amtare», thotë Ulaj.

Nga ana tjetër, Nexhat Maloku, kryetar i LAPSH-it, ka inkurajuar mësimdhënësit që të punojnë tutje në këto kushte që i kanë, duke shpresuar në të ardhmen për kushte edhe më të mira.

„Kur flasim për përmirësimin e kushteve për mësimdhënësit, kjo lidhet me financat. Financat në shtetet më të pasuara, siç është Zvicra, ku jemi këtu, është si një lloj «thembre e Akilit», e lëre më në Kosovën e shkretë. Nuk shpresojmë edhe shumë, por mundësitë janë dhe varet sa është vullneti për të bërë diçka“, thekson Maloku.

«Pa marrë parasysh ne si mësimdhënës duhet të mundohemi që t’i përkrahim fëmijët në mësimin e gjuhës së tyre amtare, që ata të përforcojnë gjuhën e tyre, të ruajnë identitetin e tyre kombëtar, por edhe njëkohësisht një identitet dyzues evropian dhe shpresojmë në ditë të mira», thotë në këtë festë Maloku.

LAPSH-i megjithatë duket të jetë i organizuar mirë dhe tashmë ka krijuar traditën e organizimit të vet.

«LAPSH-i funksionon në shumicën e kantoneve të Zvicrës. Mbajmë takime të vazhdueshme. Sivjet kemi organizuar disa seminare për aftësimin e mësimdhënësve. Këtë muaj do të mbahen pjesët përfundimtare të këtyre seminareve që e forcojnë elementin kryesor – cilësinë e mësimdhënies. Po ashtu në plan i kemi disa takimet me prindër dhe institucione përgjegjëse për rritjen e numrit të nxënësve“, tregon Maloku.

Lidhja e Arsimtarëve dhe Prindërve Shqiptarë (LAPSH) “Naim Frashëri ka të angazhuar 70 mësues në tërë Zvicrën, të cilët punojnë me afro 3 mijë nxënës.

Kryetari i LAPSH ka treguar për disa variante që po shqyrtohen si mundësi për ta zgjidhur fiancimin e mësimit plotësues në gjuhën amtare në Zvicër.

«Ne kemi formuar një shoqatë, e cila quhet Shoqata e interesit të gjuhëve të para, ku janë përfshirë shkencëtarë zviceranë, fytyra të njohura publike me qëllimin themelor që Zvicra të marrë përsipër pagesën e mësimdhënësve, njëkohësisht edhe kontrollin e mësimit plotësues në gjuhën amtare. Ndërkohë po punohet në këtë fushë, por fjala përfundimtare i mbetet megjithatë politikës. Duke shpresuar se aktorët politikë do të ndryshojnë këtë qasje, duke u bazuar në shembujt e vendeve evropiane, ku vendi nikoqir është bartës i mësimit plotësues të gjuhës amtare“, potencon Maloku.

Sido që të jetë, manifestimin në Shliren e ka ndihmuar Ministria e Diasporës, përkatësisht Qendra Kulturore për Zvicër.
Ushtruesja e detyrës së drejtoreshës së Qendrës Kulturore të Kosovës, Shukrije Ramadani, tha se më shumë po merremi me festa se me punë.

Sipas zonjës Ramadani, kjo është e meta jonë jo vetëm në Kosovë, por edhe te ne në Zvicër.

„Ne duhet të punojmë shumë, sidomos në arsimin e gjeneratave të reja dhe shtimin e numrit të nxënësve shiptarë që vijojnë mësimin plotësues në gjuhën shqipe këtu në Zvicër. Po krijohen 3 gjenerata dhe çdo ditë më shumë po i largohemi shkollës shqipe, që është një tragjedi e madhe për ne. Nuk guxojmë t‘i lejojmë fëmijët tanë të asimilohen“, tha me këtë rast Shukrije Ramadani.

Për konsullin e Kosovës në Cyrih, Islam Spahiu, ka ardhur koha të mos merremi shumë me të kaluarën, por të merremi me emancipimin kombëtar së bashku me integrimin në strukturat e shoqërisë zvicerane.

„Në manifestime të tilla në të ardhmen do të dëshiroja të flitet më shumë për arritjet e komunitetit, sesa vajtimi për të kaluarën, por të investojmë më shumë në gjeneratat e ardhshme, të cilat kanë filluar të japin suksese të mëdha, siç është rasti edhe me eliten e futbollit zviceran“, deklaroi diplomati kosovar.

Për pjesën artistike është përkujdesur ansambli «Trojet» nga Winterhuri, në udhëheqjen e Zeqë Gashit dhe udhëheqësit artistik, koreografit Arsim Berisha.

Meqë po festonin tri festa, nëxënësit e shkollës shqipe në Kantonin e Cyrihut kanë recituar dhe kënduar për bukuritë e atdheut, për mësuesin, për nënën e librin.

Shukrije Ramadani është përkujdesur në fund t’u ndajë nga një dhuratë mësimdhënësve shqiptarë të Cyrihut që po mbajnë gjallë shkollën shqipe në këtë kanton.