Dr. Valbona, mjekja që ka kaluar nga dy klasë për një vit

"Është një siguri më e madhe për pacientët shqiptarë kur dikush iu flet shqip. Sidomos tek prindërit që i sjellin fëmijët e tyre tek unë, komunikimi dhe besimi është më i lehtë”, thotë dr, Vabona Halili

Doktor Valbona Halili sot ushtron me krenari profesionin e stomatologes në ordinancën e re në Glarus. Shtëpia është një trashëgimi kulturore e qytetit Glarus, e cila është kthyer në një qendër medicinale me një spektër të gjerë të shërbimeve mjekësore. Aty, krahas ordinancës stomatologjike të doktor Valbona Halilit, punon dhe ordinanca e mjekësisë së përgjithshme, fizioterapisti dhe të tjerë.

“Mirëpo të gjithë janë të pavarur nga njëri tjetri”, thotë doktor Halili. “Ordinanca jonë sot është më modernja në kantonin e Glarusit. Këtu gjithçka është digjitale dhe posedojmë të gjitha mjetet më moderne të punës”.

Para se të zhvendosej në ordinancën e re, e cila gjendet në rrugën kryesore të qytetit dhe jo më larg se 100 metra nga ordinanca ku ajo ka marrë hapat e parë të punës si e pavarur, dr. Valbona Halili, ka krijuar një eksperiencë të vyer pune. Këtë e ka bërë në një ordinancë për fëmijë dhe ka vazhduar më pas, me të gjitha grupmoshat, në një ordinancë tjetër.

“Pas përfundimit të studimeve, në vitin 2011, kam filluar të punoj në një ordinancë për fëmijë në kantonin Aargau në Wettingen. Aty kam punuar një vit dhe nga viti 2012 deri më 2016 kam vazhduar të punoj me të gjitha grupmoshat në qytetin Pfäffikon të Schwyz-it”.

Në këtë vend ajo ka pasur mundësi të njihej nga afër me funksionimin e një ordinance edhe nga aspekti menaxherial.

Nëna infermiere, e bija mjeke

“Qëllimi im ka qenë gjithmonë, edhe si fëmijë, të studijoj mjekësinë e të kem ordinancën time. Kjo dëshirë më është fiksuar duke parë nënën time që është me profesion infermiere”.

Synimi për të pasur ordinancën e vet, asaj i është forcuar edhe më tepër kur ka filluar të punojë në Pfäffikon, sepse në atë ordinancë, thotë ajo, të shumtën e kohës ka punuar vetëm.

“Pronarja e asaj ordinance kishte tre fëmijë dhe nuk ishte shumë prezente në ordinancë. Kështu, unë kisha mundësinë ta shihja funksionimin e një ordinance edhe nga këndi menaxherial”, shfleton kujtimet drejt pavarësimit mjekja e diplomuar në Universitetin e Cyrihut, e cila sot ju flet pacientëve të saj shqiptarë rrjedhshëm në gjuhën shqipe.

“Është një siguri më e madhe për ta kur dikush iu flet shqip. Sidomos tek prindërit që i sjellin fëmijët e tyre tek unë, komunikimi dhe besimi është më i lehtë. Prej muajit gusht të vitit të kaluar e deri më tani është rritur dukshëm numri i pacienteve dhe pacientëve shqiptarë”, tregon ajo. Për më tepër, të gjitha informacionet për trajtimin e dhëmbëve mund ti merrni në faqen e stomatologes, www.halili.ch.

Pacientët nuk e kanë paragjykuar për prejardhjen

Ordinanca e stomatologes shqiptare me prejardhje nga Shkupi, punon me pacientë të të gjitha grupmoshave. “Mirëpo tek pacientët shqiptarë, më të shumtët janë fëmijë”, shpjegon Halili – për shkak se shumica posedojnë një sigurim për dhëmbë dhe pagesa është më e lehtë”.

Megjithatë, pacientët zviceranë përbëjnë bërthamën e klientelës së saj.

“Deri tani nuk kam ndjerë ndonjë veçim nga pacientët zviceranë, ta zëmë nga shkaku i prejardhjes, veçon Halili. Ajo kishte blerë ordinancën nga mjeku zviceran, që dëshironte t’ia shiste ndonjë mjekeje nga kantoni i Glarusit dhe që ka mbaruar studimet në ndonjë universitet të Zvicrës. Menjëherë pas kësaj, ai u kishte shkruar pacientëve një letër njoftuese duke sqaruar për dr. Valbonën se është rritur dhe shkolluar në Glarus e Cyrih. Reagimi, thotë ajo, “ka qenë mjaft pozitiv, pacientët nuk janë larguar”.

Aktualisht ajo punon bashkë me një mjek dhe tri asistente. “Mirëpo dëshira është që të rritemi, sepse në vendin e ri kemi kapacitete për më tepër pacientë”, zbulon mjekja që deri në moshën 5 vjeçare ja jetuar në Shkup.

 Shkollën shqipe e ka vizituar që në moshën 5 vjeçare

Në vitin 1992, kur ishte vetëm 5 vjeçe, ka ardhur në Zvicër. Po atë vit është regjistruar në çerdhe në fshatin Bilten të kantonit Glarus dhe në të njejtën kohë ka filluar të shkojë bashkë me vëllëzërit në shkollën shqipe në fshatin Bilten.

“Shkolla shqipe më ka ndihmuar shumë në shkrim dhe lexim. Kam kaluar nga çerdhja direkt në klasën e dytë. Për këtë i jam shumë mirënjohëse shkollës shqipe”, thotë Halili.

Mjekja Valbona Halili, ka vijuar shkollën fillore në fshatin ku është rritur dhe ku vazhdon ende të jetojë, me bashkëshortin Bekimin dhe djalin Jonin.

“Gjimnazin e kam ndjekur në Glarus dhe studimet bazike ne Fakultetin e Mjekësisë në Fribourg”, thotë ajo.

Dy vitet e para ka ndjekur mjekësinë e përgjithshme dhe më pas ka vazhduar studimet për Stomatologji në Universitetin e Cyrihut.

Në vitin 2011 ka diplomuar, kurse dy vite më vonë ajo ka doktoruar në Universitetin e Cyrihut.

Sot, vajza që dikur kalonte nga dy klasë, falë dhe mësimit plotësues që ka ndjekur në gjuhën shqipe, drejton njërën nga ordinancat më moderne të stomatologjisë në qendër të Glarusit. Mërgata jonë e asaj ane, që ka nevojë për trajtimin e dhëmbëve, të vet apo të fëmijëve, mund të trokasë në ordinancën e Dr. Valbona Halilit dhe të zgjedhë trajtimin: në gjuhën shqipe apo gjermane. Ajo i flet rrjedhshëm të dyja.

I është mirënjohëse shkollës shqipe në Zvicër

“Shkolla shqipe më ka ndihmuar shumë në shkrim dhe lexim. Kam kaluar nga çerdhja direkt në klasën e dytë. Për këtë i jam shumë mirënjohëse shkollës shqipe”, thotë Halili. Ajo ka vijuar shkollën fillore në fshatin ku është rritur dhe ku vazhdon ende të jetojë, me bashkëshortin Bekimin dhe djalin Jonin.

---