Arroganca dhe prepotenca e Edi Ramës*

Edi Rama nga Beogradi në Prishtinë u kthye si një humbës mendjemadh. Derisa në Beograd heshtur pranoi që Kosova të anashkalohet në planet ekonomike të Shqipërisë me Serbinë, në Prishtinë doli mospërfillës dhe arrogant ndaj publikut të Kosovës.

Nënçmimi që ua bëri panelit intervistues të Klan Kosova ishte nënçmim dhe mospërfillje e publikut të Kosovës, i cili besoj siç kam pritur edhe unë, do të kenë pritur edhe shumica e të tjerëve, përgjigje në disa prej pyetjeve që kanë të bëjnë me raportet e Republikës së Shqipërisë me Republikën e Serbisë, të cilat nën qeverisjen e Edi Ramës në Shqipëri po avancojnë dukshëm. E keqja nuk qëndron në avancimin e këtyre raporteve, por në mënyrën e avancimit të tyre duke shpërfillur mëvetësinë e Kosovës dhe të shqiptarëve të tjerë në këto marrëdhënie. Edi Rama akuzoi për injorancë panelin intervistues të Klan Kosova, duke konstatuar se projekte e tilla janë multilaterale dhe të kontraktuara në Takimin e Berlinit të BE-së, por sigurisht se terminologjia e BE-së nuk është patjetër ajo e Vuçiçit, të cilën  këtë herë u kujdes ta zbatojë me përpikëri Edi Rama. Por Edi Rama  s’u përgjigj në pyetjen e Dastin Pallaskës, të cilit s’mund t’i bëheshin vërejtje as sa i përket nivelit gjuhësor e as të qartësisë së formulimit të pyetjeve, se ku mbeti qoftë edhe simbolikisht ekzistimi i mëvetësisë dhe i sovranitetit të Kosovës në këto marrëdhënie. Ç’është e vërteta këtu fajin e Ramës e zbut në një masë budallallëku i Enver Hoxhajt, Ministrit të Punëve të Jashtme të Kosovës, i cili pa kurrfarë sensi kërkoi që Shqipëria të mos flasë në emër të Kosovës, se ja që na qenka ai dhe vetëm ai, i cili mund t’i përfaqësuaka interesat e Kosovës. Me një fjalë për Enver Hoxhajn, Ministrin e Punëve të Jashtme të Kosovës, Republika e Shqipërisë është si Republika e Malit të Zi apo ajo e Maqedonisë!

Edi Rama shkoi aq larg sa me përçmim dhe arrogancë kërkoi “përkthim” për pyetje e Petrit Zogajt, të cilat, zaten, nuk ishin qartë të formuluara, por të kuptueshme për çdo shqipfolës me vullnet të mirë përveç Edi Ramës. Ç’është e vërteta as gjuha shqipe e Edi Ramës nuk është as sa duhet e rrjedhshme, as koncize, por shpesh e stërzgjatur dhe monotone. Edi Rama ka nevojë të përmirësojë dukshëm jo vetëm përmbajtjen dhe stilin e gjuhës së tij, por sidomos të kontrollojë arrogancën dhe prepotencën e fjalorit dhe të sjelljeve të tij.

Nisma e Edi Ramës, e filluar simbolikisht në Prizren, e takimit të dy qeverive – të asaj të Shqipërisë dhe të asaj të Kosovës, mbaroi përfundimisht në intervistën e tij dhënë në Klan Kosova. Për të interesat e Kosovës dhe të shqiptarëve të tjerë të regjionit ju nënshtrohen interesave të tij dhe të Vuçiçit dhe marrëveshjeve multilaterale të arritura nën koordinimin e BE-së. Është shumë e qartë rëndësia që ka për përparimin ekonomik të Shqipërisë dhe të Kosovës bashkëpunimi me BE-në, por është e pakontestueshme edhe ndikimi, qoftë edhe simbolik, që ka veprimtaria dhe qëndrimi i Qeverisë së Republika e Shqipërisë për të gjithë shqiptarët kudo që jetojnë, pra edhe në Republikës e Kosovës.

Me arrogancën e shfaqur të Edi Ramës sikur m’u duk më e justifikueshme edhe arroganca dhe prepotenca e opozitës shqiptare në Parlamentin e Shqipërisë dhe jashtë saj. M’u duk se Rama arrogant dëgjon dhe  kupton vetëm gjuhën e folur nga vetë ai – atë të arrogancës dhe të prepotencës, të cilën zaten duhet ta ndalë si ai, ashtu edhe oponentët e tij dhe imitatorët e tyre në Prishtinë.

* Pikëpamjet e shprehura në këtë opinion shprehin mendimet e autorit dhe nuk reflektojnë domosdoshmërisht mendimet e redaksisë.