Arbër Rama “EAZ”, artisti që sfidon klishetë për rapin

“Dëshiroj që muzika ime të jetë një frymëzim për të rinjtë, t’i motivojë ata të ndjekin ëndrrat dhe të besojnë në vetvete, pa u ndikuar nga stereotipat”

Spektakli më i madh i ndarjes së çmimeve për muzikë të popullarizuar në Zvicër, ”Swiss Music Awards”, i mbajtur në maj të këtij viti, konfirmoi atë që tashmë pritej: reperi me rrënjë shqiptare Arbër Rama, i njohur me emrin e tij artistik EAZ, fitoi çmimin për hitin muzikor të vitit, me këngën “Juicy”.

30-vjeçari është fituesi logjik i kësaj gare pasi “Juicy” u bë kënga e parë në dialekt (“Schweizer Deutsch”) që zbarkoi në listat globale virale të Spotify në vitin  2023 dhe tani ka grumbulluar mbi 20 milionë transmetime, shkruanin mediat ato ditë.

Të mos harrojmë: EAZ ose Arbër Rama ka qenë mbase më meritori në vlerësimin e publikuar vitin e kaluar se këngëtarët me rrënjë shqiptare po ua kalojnë për nga dëgjueshmëria kolegëve të tyre që kultivojnë muzikë tradicionale zvicerane.

Në intervistën për Albinfo.ch, Arbri flet për arritjet e tij dhe planet për të ardhmen.

Albinfo.ch: Na trego pak rreth jetës tënde si fëmijë. Si ka qenë Arberi në fëmijëri? A ke dashur të merresh gjithmonë me muzikë, apo ke pasur ndonjë pasion tjetër?

EAZ: Në fëmijëri kam qenë një djalë i gjallë dhe shumë kureshtar. Muzika ka qenë gjithmonë pjesë e jetës sime, por në fillim nuk mendoja se do ta ndiqja si profesion. Kisha shumë pasione të tjera, si sporti dhe arti vizual, por me kalimin e kohës, muzika u bë rruga ime kryesore.

Albinfo.ch: Çfarë ju frymëzoi të ndiqni karrierën në muzikë?

EAZ: Frymëzimi im erdhi nga dëshira për të shprehur veten dhe për të ndarë ndjenjat dhe përvojat e mia me të tjerët. Gjithashtu, artistët që dëgjoja gjatë rritjes më motivuan shumë për të krijuar një stil timin unik.

Albinfo.ch: Cili ka qenë ndikimi i familjes tuaj në jetën dhe karrierën tuaj si artist?

EAZ: Familja ime ka luajtur një rol shumë të madh. Ata më kanë mbështetur gjithmonë dhe më kanë inkurajuar që të ndjek ëndrrat e mia, edhe kur sfidat dukeshin të mëdha. Kjo mbështetje ka qenë themelore për suksesin tim.

Albinfo.ch: A keni pasur vështirësi të dallueshme si një artist me origjinë shqiptare që vepron në një treg ndërkombëtar? Si i keni përballuar ato?

EAZ: Po, sfidat kanë qenë të shumta, si paragjykimet dhe vështirësitë për t’u pranuar në një treg të huaj. Por përmes punës së palodhshme dhe përkushtimit, kam arritur të krijoj një zë timin që e kapërcen origjinën kombëtare dhe arrin audienca të ndryshme.

Albinfo.ch: Çfarë ju motivoi të krijoni labelin tuaj, Bulletproof Music, dhe cilat janë synimet tuaja për të ardhmen e këtij projekti?

EAZ: Motivimi im ishte krijimi i një platforme për artistët e rinj që kanë talent, por nuk kanë mundësitë e duhura. Synimi im është që Bulletproof Music të bëhet një label që zbulon dhe promovon talentet më të mira në tregun ndërkombëtar.

Albinfo.ch: Muzika juaj shpesh përfshin elemente nga gjuhë të ndryshme. Si e balanconi përdorimin e shqipes, gjermanishtes zvicerane dhe anglishtes për të arritur një audiencë më të gjerë?

EAZ: Balanca vjen natyrshëm, pasi unë jam rritur mes kulturave të ndryshme. Duke kombinuar këto gjuhë, mund të arrij një audiencë më të gjerë, ndërsa ruaj identitetin tim kulturor.

Albinfo.ch: A ka ndonjë projekt bashkëpunimi me artistë shqiptarë, që mund të na zbuloni?

EAZ: Sa për projekte të reja, po punoj me disa artistë të rinj shqiptarë dhe ndërkombëtarë – por do t’i zbuloj në kohën e duhur.

Albinfo.ch: Ju keni punuar gjithashtu me emra ndërkombëtarë si Snoop Dogg. Si erdhi deri te ky bashkëpunim?

EAZ: Ky bashkëpunim erdhi përmes rrjeteve profesionale dhe respektit të ndërsjellë për muzikën. Ishte një eksperiencë e jashtëzakonshme dhe një mundësi për të mësuar nga një legjendë.

Albinfo.ch: Ju e keni përshkruar veten si një reper që nuk i përket stereotipit të “gangsta rap”. Si dëshironi që muzika juaj të ndikojë te të rinjtë?

EAZ: Dëshiroj që muzika ime të jetë një frymëzim për të rinjtë, t’i motivojë ata të ndjekin ëndrrat dhe të besojnë në vetvete, pa u ndikuar nga stereotipat.

Albinfo.ch: Cilat janë synimet tuaja për vitet e ardhshme? A planifikoni të zgjeroni ndikimin tuaj jashtë Zvicrës dhe vendeve shqiptare?

EAZ: Synimi im është të arrij një audiencë globale dhe të krijoj një trashëgimi që frymëzon brezat e ardhshëm. Muzika ime synon të kalojë kufijtë dhe të lidhet me njerëz nga të gjitha kulturat.

Albinfo.ch: A po punoni në një album të ri ose projekte të tjera muzikore? Çfarë mund të presë audienca juaj?

EAZ: Po, jam duke punuar në një album të ri që do të përfshijë bashkëpunime dhe një miks të zhanreve. Audienca ime mund të presë diçka të freskët dhe plot energji.

Albinfo.ch: A mendoni se muzika shqiptare ka potencial për të depërtuar më thellë në tregun ndërkombëtar dhe si mund të kontribuoni ju në këtë?

EAZ: Absolutisht, muzika shqiptare ka shumë potencial. Me bashkëpunime ndërkombëtare dhe promovim strategjik, mund të sjellim kulturën tonë në vëmendjen globale.

Albinfo.ch: Na thoni, çka do të cilësonit si arritjen e vitit 2024 dhe çka pritni nga viti i ardhshëm?

EAZ: Arritja më e madhe e vitit 2024 ishte zgjerimi i audiencës sime dhe suksesi i projekteve të mia muzikore. Nga viti i ardhshëm pres risi, bashkëpunime të mëdha dhe një nivel të ri në karrierën time.

---