A do të duhet të zgjedhë mes dy kombësive një fëmijë me dy shtetësi në Austri?

Austria ka rregulla strikte për shtetësinë dhe nuk do të lejojë shtetësinë e dyfishtë në shumicën, por jo të gjitha rastet. A do të duhet të zgjedhë një fëmijë kur të arrijë 18 vjeç?

Austria ka disa nga rregullat më të rrepta të natyralizimit në Evropë. Përveçse është i shtrenjtë (me tarifa dhe kosto që arrijnë në më shumë se 2,000 € në disa raste), procesi zakonisht nënkupton që aplikantët duhet të heqin dorë nga shtetësia e tyre origjinale, transmeton albinfo.at.

Shtetësia e dyfishtë thjesht nuk lejohet për shumicën e njerëzve në Austri. Kjo jo vetëm që do të thotë që aplikantët duhet të heqin dorë nga shtetësia e vendit të tyre për t’u natyralizuar, por gjithashtu se austriakët që jetojnë jashtë vendit do të duhet të heqin dorë nga të qenit shtetas austriakë nëse dëshirojnë të kenë të drejta të plota (përfshirë votën) aty ku jetojnë.

Sipas ligjit, janë vetëm tri raste kur lejohet dyshtetësia në rastet e natyralizimit, shkruan thelocal.at.

Së pari, nëse mbajtja e shtetësisë origjinale është në interesin e Republikës së Austrisë, zakonisht për shkak të arritjeve ose statusit të një personi, një rast i famshëm është ai i Arnold Schwarzenegger-it të lindur në Styria. Aktori dhe politikani kërkoi (dhe iu dha e drejta) të mbante nënshtetësinë e tij austriake pasi u natyralizua si shtetas amerikan më 1983.

Së dyti, nëse arsyet personale ia vlen të merren parasysh, ligji nuk ofron ndonjë shembull specifik dhe një përjashtim do të varej nga rrethanat individuale.

Shtetësia nga lindja

Megjithatë, gjërat janë shumë të ndryshme kur bëhet fjalë për shtetësinë nga prejardhja – si për shembull kur një fëmijë lind nga një nënë ose baba austriak.

Ashtu si në shumë vende të tjera evropiane, rregullat e shtetësisë së Austrisë bazohen në gjak (jus sanguinis). Një fëmijë konsiderohet austriak nëse të paktën njëri nga prindërit e tij është austriak, pavarësisht nga vendi i lindjes. Mund të bëhet paksa e ndërlikuar, por fëmija është austriak nëse prindërit janë të martuar dhe njëri prej tyre është austriak. Nëse ata nuk janë të martuar, fëmija është automatikisht austriak nëse nëna ka nënshtetësi austriake dhe do ta ketë të drejtën nëse babai austriak nënshkruan një njohje të atësisë.

Gjëja më e rëndësishme, megjithatë, është se nëse një fëmijë ka të drejtën e gjakut për nënshtetësinë austriake dhe të drejtën e gjakut për një shtetësi tjetër, ai do të ketë të drejtë për të dyja dhe do të jetë i dyfishtë (ose më shumë) në Austri.

Nëse një nënë austriake dhe një baba amerikano-kroat kanë një fëmijë, ai fëmijë do të ketë të drejtën e nënshtetësisë austriake, amerikane dhe kroate. Dhe, gjithashtu e rëndësishme: nuk do të duhet të zgjedhë mes asnjërës prej tyre pasi të mbushë 18 vjeç.

Miti i “duhet të zgjedhësh sapo të mbushin 18 vjeç” është i përhapur në Austri, por nuk është i vërtetë. Faqja e internetit e qeverisë austriake është e qartë për këtë:

“Nëse në rastin e prindërve të kombësive të ndryshme (austriake dhe një tjetër), parimi i prejardhjes zbatohet edhe në vendin e origjinës së prindit të huaj, fëmija është dyshtetas. Sipas ligjit austriak, fëmija nuk ka nevojë të vendosë për një shtetësi kur ai ose ajo të arrijë moshën madhore – megjithatë, mund të ndodhë që shteti tjetër të kërkojë një vendim”, thuhet në faqe.

E gjitha do të varet, atëherë, nga vendi tjetër. Nëse lejon shtetësi të shumëfishta nëpërmjet prejardhjes dhe nuk kërkon një vendim pas moshës madhore, atëherë personi do të jetë shtetas i dyfishtë (ose i shumëfishtë).

Si mund të humbasë dikush shtetësinë austriake?

Kjo nuk do të thotë se ky person do të ketë shtetësinë përgjithmonë. Ka disa raste në të cilat dikush mund të humbasë shtetësinë austriake, duke përfshirë marrjen e qëllimshme të një shtetësie të huaj (përveç nëse personi ka aplikuar dhe i është dhënë mbajtja e shtetësisë).

Humbja e shtetësisë austriake është gjithashtu e mundur duke hyrë vullnetarisht në shërbimin ushtarak të një shteti të huaj, duke dëmtuar interesin ose reputacionin e Republikës së Austrisë, ose duke mos hequr dorë nga shtetësia e mëparshme brenda dy viteve nga marrja e shtetësisë austriake.

Pra, një fëmijë me shtetësi të dyfishtë nuk do të duhet të zgjedhë kurrë?

Në fakt, po: ekziston një rast në të cilin një fëmijë me dy shtetësi do të duhet të zgjedhë ose të heqë dorë nga shtetësia austriake ose nga shtetësia tjetër pasi të arrijë moshën madhore.

Nëse një fëmijë është natyralizuar austriak me prindin e tij, por shteti i shtetësisë origjinale nuk i lejon të miturit të heqin dorë, ata do t’i mbajnë të dy. Për shembull, një baba britanik është duke u natyralizuar dhe shton djalin e tij 10-vjeçar në këtë proces.

Pasi të përfundojë procesi, të dyve do t’u jepet shtetësia austriake dhe do të kenë dy vjet kohë për të hequr dorë nga shtetësia britanike. Megjithatë, Britania e Madhe nuk i lejon fëmijët e mitur të heqin dorë nga shtetësia. Pra, babai do të duhet të tregojë prova të ligjit të Mbretërisë së Bashkuar tek autoritetet austriake.

Fëmija do të ketë përkohësisht shtetësi austriake dhe britanike, por pritet të heqë dorë nga njëra pasi të mbushë 18 vjeç.

---