Vlore Krug: Arsimi është më shumë se vetëm shkolla

"Imazhi i ngurtë i mësuesve që brezi im ende e përjetoi, më në fund i përket së shkuarës", thotë studiuesja e gjermanistikës, Vlore Krug

Mësuesit janë shumë më tepër sesa transmetues të njohurive – ata kanë përgjegjësinë për të formuar një të ardhme më të drejtë dhe të paanshme. Por imazhi i ngurtë i mësuesve që brezi im ende e përjetoi, më në fund i përket së shkuarës, thotë studiuesja e gjermanistikës, Vlore Krug. Për ditën botërore të mësuesit (5 tetor) i shtrojmë asaj, ndër të tjera, pyetjet si: Deri kur do të tolerohen rezervat raciste që janë pengesë në rrugët edukative të fëmijëve? Një klasë pa diskriminim nuk është vetëm e dëshirueshme, por thelbësore për të mundësuar të mësuarit real dhe të qëndrueshëm gjatë gjithë jetës – dhe ky ndryshim nuk duhet të ndalet në kufijtë e Gjermanisë.

Albinfo.ch: Zonja Krug, ju nuk e shihni veten si një mësuese tradicionale, por më tepër si një edukatore për të rriturit. Përse ju përshtatet më shumë ky term?

Vlore Krug: Termi mësues ishte i lehtë për t’u përkufizuar 50 vjet më parë – thjesht, dikush që jep njohuri në shkollë. Sot bëhet fjalë për shumë më tepër sesa thjesht mësimdhënie. E shoh veten si edukatore sepse punoj në shumë fusha: si studiuese e gjermanistikës, si zhvilluese organizative dhe si një person që përfaqëson perspektiva kritike ndaj racizmit dhe klasicizmit. Arsimi nuk është vetëm një çështje shkollore, por prek shoqërinë në tërësi. Dhe është e rëndësishme që t’u japim të gjithëve qasje në mundësi. Entuziazmohem sa herë që djali im, nxënës në klasën e katërt mëson për Inkluzionin (përfshirjen) dhe unë ndodh që të organizoj një  “Lunch & Learn” (“Dreko & Mëso”) në organizatën tonë me temën e neurodiversitetit po atë javë. Shumë prindër sot marrin diagnozën e tyre në të njëjtën kohë me diagnozën e fëmijës së tyre (siç është ADHD ose autizmi ose dhuntia e lartë). Kjo tregon se sa e rëndësishme është që ne si shoqëri të edukojmë vazhdimisht të dyja palët – fëmijët dhe të rriturit.

Albinfo.ch: Ju e keni ndërprerë studimin për t’u bërë mësuese pas një praktike të kryer. Cila ishte pika vendimtare?

Vlore Krug: Praktika në një shkollë të mesme gjermane ishte një hapje sysh për mua. Kam parë se sa shpesh përdoren stereotipat negativë si bazë për vlerësimet e studentëve. Për shembull, nëse një fëmijë i prindërve jogjermanë bën një gabim gjatë shkrimit, fajësohet shpejt për origjinën e tij – kështu që thuhet se fëmija nuk është mjaftueshëm kompetent nga ana gjuhësore. Por nëse një fëmijë pa sfond migrimi bën të njëjtin gabim, ata shpesh gjykohen më butësisht dhe i atribuohen rrethanave të jashtme, si p.sh. “ndoshta nuk ka fjetur mirë, kjo nuk ka të bëjë me aftësitë gjuhësore, por më tepër me paragjykimet”.  Bëhet edhe më e dukshme kur një fëmijë nga një familje më pak e privilegjuar merr një notë të mirë pavarësisht se nuk merr asnjë mbështetje nga shtëpia. Kjo arritje shpesh nuk konsiderohet aq e vlefshme sa ajo e një nxënësi që arrin të njëjtën notë, duke pasur tutor. Kjo tregon se notat shpesh nuk pasqyrojnë atë që duhet – përkatësisht kompetencën aktuale të fëmijës.

Albinfo.ch: Ju shpesh flisni për mundësi të barabarta. Çfarë do të thotë kjo konkretisht për ju?

Vlore Krug: Mundësi të barabarta do të thotë që çdo fëmijë ka të drejtë të zhvillojë potencialin e tij – pavarësisht prejardhjes sociale apo paragjykimeve. Ende e mbaj mend mirë që në klasën e katërt, si emigrante, nuk kam marrë rekomandim për shkollë të mesme. Më është dashur të kaloj rrugën dytësore arsimore, sepse në të parën nuk më është dhënë rasti. Sot e shoh si detyrën time të tregoj për mundësitë e barabarta, edhe në kompani. Dhe kjo fillon me CV-në: Shumë njerëz nuk mund të përballojnë certifikata ose praktika të shtrenjta për shkak të prejardhjes së tyre sociale. Megjithatë, duhet të merret parasysh edhe përvoja e pasur e fituar përmes një rruge alternative arsimore. Kur dy persona mbërrijnë në katin e shtatë – njëri duke përdorur ashensorin dhe tjetri përmes shkallëve – kjo tregon pikat e forta të këtij të fundit.

Albinfo.ch: Çfarë do të thotë për ju të mësuarit?

Vlore Krug: Të mësuarit është shumë më tepër sesa thjesht të marrësh nota të mira. Kjo ka të bëjë shumë me gabimet, dështimin, qëndrueshmërinë dhe aftësinë për të marrë kritika. Duhet të mësojmë të mos qëndrojmë në vend, por të përshpejtojmë kur gjërat vështirësohen. Shoqëria jonë shpesh vepron sikur gabimet janë një gjë e keqe. Por nëse nuk dështoni kurrë, nuk do të keni kurrë mundësinë për t’u zhvilluar më tej. Për mua, të mësuarit është një proces i përjetshëm.

Albinfo.ch: Ku i shihni aktualisht sfidat kryesore në shkollë?

Vlore Krug: Një sfidë e madhe është mungesa e përfaqësimit. Shumë fëmijë nuk e shohin veten të pasqyruar tek mësuesit. Kjo bën që ata të ndihen se “përkasin” më pak dhe se janë në gjendje të kenë më pak besim në shkollë. Përveç kësaj, arsimi shpesh duket si një konkurs që ofron përparësi për ata që tashmë janë të privilegjuar. Fëmijët mësojnë shumë më tepër sesa thjesht ajo që mësohet në shkollë – ata mësojnë elasticitetin, tolerancën ndaj frustrimit dhe tejkalimin e pengesave. Këto janë aftësi që ndonjëherë janë më të rëndësishme në shoqërinë tonë sesa notat në një lëndë shkollore.

---