Xhaka gati për ndeshjen e sotme kundër Bayernit

(KEYSTONE/DPA/Marius Becker)

Lideri i klasifikimit kundër të dytit në tabelë. Kampioni në fuqi kundër ekipit me numër rekord të titujve. Makineria e golave ndaj njërit prej ekipeve me më së shumti gola të pranuar.

Dueli i gjigantëve aktualë të Bundesligës zhvillohet të shtunën. Nga ora 18:30 takohen Bayerni e Bayer Leverkuseni. Derbi i takon xhiros së pestë. Bayerni është lider me 12 pikë, ndërsa Leverkuseni pas xhiros së katërt mban pozitën e dytë me nëntë pikë.

Në muajin shkurt, Bayerni u mposht 3:0 nga Leverkuseni. Nuk kishte asnjë shans për bavarezët në atë ndeshje. Por situata është krejt ndryshe tani.

I pari që tërhoqi vërejtjen pas fitores së vështirë, 4:3, ndaj Wolfsburgut në fundjavën e kaluar ishte Granit Xhaka. Fitorja u arrit me gol të minutës së fundit.

“Vlerësojmë se jemi top-ekip. Por një top-ekip nuk i pranon tri gola për 45 minuta”, kishte thënë Xhaka. Ai kërkoi përgjegjësi nga të gjithë lojtarët e kampionit aktual të Gjermanisë.

“Mbrojtja përbëhet nga 11 lojtarë, jo nga një apo dy. Kemi ende shumë punë për të bërë në mbrojtje”, ka shtuar Xhaka, që pritet ta udhëheq mesfushën e Leverkusenit në derbin e veçantë.

Ka bazë ajo që tha Xhaka. Leverkuseni gjatë gjithë edicionit të kaluar pranoi 24 gola. Ndërkohë në katër ndeshje të këtij edicioni i pranoi plot nëntë gola. Trajneri Xabi Alonso është pajtuar me Xhakën. Ai e di se pa ndryshuar qasja në mbrojtje është e pamundur të arrihet diçka e madhe.

Situata është krejt ndryshe te bavarezët. Nën urdhrat e Vincent Kompany, Bayerni po shkëlqen në Bundesligë dhe garat e tjera. Bayerni ka fituar të gjitha gjashtë ndeshjet garuese, ndërsa i ka realizuar plot 29 gola.

Fokusi do të jetë te dy talente të mëdha. Shokët Jamal Musiala dhe Florian Wirtz e udhëheqin sulmin e Gjermanisë. Të dy të jashtëzakonshëm me top, të dy 21-vjeçarë dhe të dy në top formë.

Musiala tashmë i ka tre gola e tri asistime në gjashtë paraqitje për Bayernin. Wirtzi i ka gjashtë gola e një asistim në shtatë paraqitje te Leverkuseni.

Për derbin e Bundesligës ka interesim shumë të madh. Ndeshja në “Allianz Arena” do të transmetohet në mbi 200 shtete. Stadiumi natyrisht do të jetë i mbushur me shikues. Biletat janë shitur shumë javë më parë. Sipas raportimeve, biletat në treg të zi kushtojnë deri në 6000 euro.