Ajeti: Kemi tre finale, çdo ndeshje është speciale për ne

Arlind Ajeti tregoi ndjesitë në prag të Kampionatit Evropian dhe theksoi se është gati 100% për të dhënë kontributin e tij

Qendërmbrojtësi i Kombëtares shqiptare, Arlind Ajeti, doli këtë të mërkurë në një konferencë për mediat nga kampi bazë i kuqezinjve në Kaiserau në Kamen.

Ajeti tregoi ndjesitë në prag të Kampionatit Evropian dhe theksoi se është gati 100% për të dhënë kontributin e tij. Futbollisti kuqezi foli edhe për tre ndeshjet e grupit të Shqipërisë, duke i cilësuar si finale dhe shtoi se edhe Kombëtarja ka shanset e veta në këtë grup, shkruan FSHF, transmeton albinfo.ch.

Evropiani i dytë, si ndiheni? – Shumë mirë, unë besoj se çdo lojtar që është i grumbulluar ndihet mirë. Është diçka speciale, sidomos kur bëhet fjalë për Kampionatin Evropian.

Çfarë do të bëjë Ajeti ndryshe në këtë Evropian? – Nuk e di, mundohem të jem sa më pranë ekipit. Nëse do luaj ose jo e vendos trajneri. Unë e mbështes Kombëtaren nga jashtë fushe dhe sigurisht nga fusha nëse do të luaj.

Keni pasur një sezon ku keni kaluar edhe një dëmtim, a jeni gati 100%?  – Dëmtimet që kam pësuar janë pjesë e futbollit. Jam përgatitur mirë, dy ndeshjet miqësore kanë qenë të rëndësishme për mua dhe jam gati 100 %.

A është ndeshja me Italinë kyçe për fatin e Shqipërisë në grup? – Ne kemi shpresat tona në çdo ndeshje. Në futboll mund të ndodhë gjithçka. Ne do të japim maksimumin. Si në ndeshjen e parë dhe në të fundit do të mundohemi të marrim rezultat pozitiv.

Si e shihni ndeshjen e parë me Italinë? – Për momentin kemi analizuar gjithë ekipin e Italisë, në ditët e ardhshme do të specifikojmë dhe lojtarët individualë. Ne duhet të përgatitemi për çdo sulmues. Gianluca Scamacca e pamë në Europa League që është shumë i rrezikshëm. Duhet të shohim edhe të tjerët se nuk luan vetëm një lojtar.

Ndeshja me Italinë, vitrinë për futbollistët shqiptarë. Si e përjetoni ju? – Kampionati Evropian është shumë i veçantë. Çdo lojtar e ka ëndërr të jetë pjesë e një Evropiani. Ne kemi fatin të jemi këtu, të japim maksimumin tonë.

Shanset për kualifikim? – Ne gjithmonë i besojmë vetes dhe ekipit e çdo lojtari të grumbulluar. Duhet të japim maksimumin dhe të shohim pastaj se çdo të ndodh.

Jemi në një grup ferri,  a do të mjaftohet Shqipëria veç me prezencën? – Kemi tre finale. Çdo ndeshje do të jetë speciale për ne. Do të jetë e vështirë, por shpresojmë të bëjmë diçka speciale.

Keni bërë llogari për këto tre ndeshje? – Llogaritë nuk i kemi bërë. Do shohim ndeshje pas ndeshje. Fillimisht me Italinë do mundohemi të marrin rezultat pozitiv, pastaj të shohim.

E ndjeni presionin nga tifozët për këto ndeshje? – Presioni është normal në futboll, si në klube si në Kombëtare. Por kur sheh tifozët si na pritën, në ndeshje dhe në stërvitje, kjo na motivon më shumë. Shpresoj dhe jam i sigurt që do të na mbështesin edhe në këto ndeshje në Evropian.

Ka shumë entuziazëm nga shqiptarët për ndeshjen me Italinë, pse është kaq e rëndësishme kjo ndeshje për tifozët shqiptarë? – Nuk di ta them, ndoshta nga karakteri që ne kemi. Gjithmonë i kemi pasur tifozët pranë nesh, na kanë dhënë shumë forcë në fushë. Ky është edhe një nga motivet se pse kemi ardhur deri këtu.

Sulmuesit apo lojtarët më të rrezikshëm italianë? – Nuk mund të them një sepse janë të gjithë të fortë. Por, sigurisht Scamacca ka bërë një kampionat shumë të mirë, është paraqitur shumë mirë në Europa League, duhet të jemi të kujdesshëm. Por sipas meje nuk duhet të përqendrohemi te vetëm një lojtar, sepse janë të gjithë shumë të fortë.

 

---