Shqipëri: Bankat fituan 210 milionë euro më 2022

Bankat tregtare në Shqipëri kanë arritur fitime rekord në vitin 2022. 23.8 mld lekë, ose 210 milionë euro është vlera e nxjerrë nga Shoqata e bankave për fitimin e përbashkët të 11 institucioneve bankare në vend, me rritje 25% në raport me vitin 2021.

Vlerësimet paraprake nga Shoqata e bankave tregojnë se kjo normë e lartë u ndikua nga zgjerimi i aktiveve dhe portofolit të kredisë, ruajtja e cilësisë së portofolit të huasë, por edhe nga efekti pozitiv, që solli rritja e shpejtë e normave të interesit.

Portofoli neto i kredisë, i matur gjithnjë me standardet IFRS, arriti në pothuajse 692 miliardë lekë, me rritje vjetore 6.8%. Ndërsa raporti i kredive të këqija ka qënë në nivelet më të ulëta historike, në masën 5%.

Rentabiliteti i sektorit bankar ka arritur nivele më të larta edhe në raport me periudhën para pandemisë, faktor që tregon ecurinë pozitive të sektorit, sidomos në dy vjetët e fundit.

Sipas strukturës, 3 nga 11 banka kanë ndarë 70% të fitimeve vitin e kaluar, ndërsa vihet re se një grup bankash të përmasave të mesme kanë parë rritje të performancës në treg./tch