E përgjegjshme, ambicioze, drejtuese ekipi në smzh: Arbela Statovci

Arbela Statovci: Kam mësuar të rritem herët. Më duhej të mësoja shpejt, si funksionojnë gjërat. Unë i trajtoj njerëzit ashtu siç do të doja që ata të më trajtonin mua 

Në një intervistë për Albinfo.ch, ne portretizojmë drejtuesen e përgjegjshme dhe të orientuar drejt qëllimeve, të ekipit në smzh (suisse management zürich). Me zonjën Arbela Statovci, i kthehemi karrierës së saj profesionale që të kuptojmë se çfarë vendi zënë rrënjët e saj shqiptare në përditshmërinë e saj të punës. 

Albinfo.ch: E nderuar zonja Statovci, çfarë rruge keni ndjekur për të qenë në gjendje të mbani pozicionin tuaj aktual si udhëheqëse e ekipit dhe anëtare e ekipit menaxhues në smzh?  

Arbela Statovci: Jam larguar nga shtëpia e prindërve kur isha 16 vjeç dhe mësova të merrja përgjegjësi që herët. Për të mbajtur kokën mbi ujë dhe në të njëjtën kohë për të financuar shkollimin, herë pas here më duhej të bëja punë të ndryshme. Qoftë në aktivitete, si prezantues në radio apo në zyrat e pasme (pa kontakt me klientët).  

Pas formimit fillestar si asistente stomatologjike në Bernë, bëra certifikatën e përfundimit të shkollës profesionale dhe më pas diplomën e shkollës së mesme për të rritur. Mësimi dhe studimi u bënë gjithnjë e më shumë një pasion im personal, prandaj, pas një qëndrimi gjuhësor në Australi, vazhdova karrierën time profesionale me një diplomë në ekonomi. Unë isha e para në familjen time që u diplomova me Master të Shkencave në Administrim Biznesi. Pastaj, gradualisht themelova biznesin tim fillestar dhe kam menaxhuar pozicione në PR & Marketing për shtatë vitet e fundit. Aktualisht jam udhëheqëse e ekipit të menaxhmentit në smzh dhe në të ardhmen po planifikoj trajnime të mëtejshme si eksperte financiare për SME-të (ndërmarrjet e vogla dhe të mesme). 

Albinfo.ch: A ka pika kontakti në punën tuaj të përditshme ku, përveç gjermanishtes, ju shërben edhe gjuha juaj amtare, shqipja, si burim? 

Arbela Statovci: Po, çdo gjuhë është e rëndësishme dhe, në një farë mase, edhe njëlloj kapitali. Unë jam shumë e lidhur dhe e përkushtuar ndaj komunitetit swissalbs. 

Prandaj, unë mund të numëroj edhe personalitete të shkëlqyera midis klientëve të mi. Sot, ekipi im dhe unë këshillojmë klientët për çështje financiare. Këto tema janë shumë të ndjeshme dhe ndonjëherë komplekse. Kuptimi i ndërsjellë është jashtëzakonisht i rëndësishëm këtu. Kështu krijohet besimi, sepse klienti duhet të kuptojë se për çfarë po bëhet fjalë. Pra, gjuha është thelbësore. Kam edhe shumë shokë skuadre nga komuniteti ynë. Ndihem shumë e privilegjuar që mund të komunikoj me ta çdo ditë në gjuhën tonë amtare. Është shumë e këndshme kjo. Ne jemi rritur këtu dhe e njohim rrjedhshëm gjuhën gjermane aq sa askush nuk do ta merrte me mend se ne kemi prejardhje të huaj. 

Duke përdorur gjuhën tonë amtare, ne ruajmë një pjesë të kulturës. Një pjesë shtëpie në jetën tonë të përditshme. 

Albinfo.ch: Çfarë eksperiencash ju inkurajojnë në karrierën tuaj profesionale të bëni gjënë e duhur dhe fakti që jeni në gjendje të ndihmoni njerëzit? 

Arbela Statovci: Mbase: cila është gjëja e duhur? Ndoshta nuk është e njëjta gjë për ju si për mua. E rëndësishme është se ne nuk i dëmtojmë njerëzit. Se ne kemi atë që është brenda nesh, që na bën të mos abuzojmë me besimin dhe t`i trajtojmë njerëzit tanë ashtu siç do të donim të na trajtonin. Më kanë mësuar që edhe nëse dikush sillet keq me mua, unë mund të shpreh mendimin tim dhe pastaj jam e lirë të largohem. Më kanë mësuar po ashtu të mos e vendos veten në nivelin e njerëzve të tillë. 

Në fillim të viteve ’90, familjes sonë i zgjatën dorën e ndihmës të rinjtë, studentët. Kam mësuar të rritem herët. Më duhej të mësoja shpejt, si funksionojnë gjërat. Dhe i isha zotuar vetes që sapo të jem në pozicion, për të ndihmuar njerëzit, do ta bëj këtë pa rezerva, pa gjykim dhe me shumë gëzim. 

Të gjithë jemi njerëz që bëjmë gabime, që mësojmë çdo ditë, që jemi të ulur në të njëjtën varkë dhe që kemi nevojë për mbështetje herë pas here. Njerëz që gjithashtu sëmuren dhe jo vetëm. 

Unë i trajtoj njerëzit ashtu siç do të doja që ata të më trajtonin mua. Kam mësuar t’ia shpjegoj vendimin tim homologut tim, pse e bëj atë çfarë po bëj apo pse nuk e bëj. Kështu krijoj mirëkuptim për vendimin tim. 

 Albinfo.ch: Kur u ofroni shërbimet tuaja klientëve privatë ose pronarëve të bizneseve të vogla, nëse ata nuk kanë pasur ende ndonjë përvojë me SMZH, cilat janë tri karakteristikat, si për buxhetet familjare ashtu edhe ato të kompanive, që kanë nevojë për mbështetje?  

Arbela Statovci: Thjesht mund të telefononi pa detyrim dhe të vini për të na njohur. Ne kemi njerëz të mrekullueshëm në ekip, të cilët janë ekspertë në disiplina të ndryshme. Ne punojmë në mënyrë të pavarur dhe mund t’u ofrojmë klientëve tanë mbështetje në pothuajse çdo rast. Çdokush mund të përdorë shërbimet tona. Nga studenti i ri tek i riu që zhvendoset në banesën e tij të parë pas përfundimit të trajnimit. Një çift që dëshiron të blejë një shtëpi ose apartament ose një familje  sapo e ngritur, që dëshiron të bëjë sigurimin e vetes. 

Mund të tingëllojë si një klishe, por ne e themi gjithsesi edhe këtë: “Kohët nuk janë të lehta”. Papritmas sëmureni. Pësoni një aksident, humbni punën. Këto janë të gjitha ngjarje jetësore që mund të ndodhin edhe në moshë të re. Ne ndihmojmë edhe në parandalimin e situatave të pakëndshme dhe në vendosjen me kohë të kursit të duhur. 

Ne ndihmojmë për të analizuar situatën aktuale dhe për të nisur hapat e duhur për të ngritur pasurinë tuaj. Ne kujdesemi për këshilla profesionale dhe cilësore. 

Nëpërmjet afërsisë personale, ne krijojmë besim dhe trajtojmë çështjet financiare në mënyrë të kuptueshme. 

(Foto: Rromir Imami)

 

 

---