Gjermanët, të fiksuar pas kursimeve

Ekonomitë familjare mbajnë 2.4 trilionë euro në depozitat bankare, shifër që kalon atë të Francës dhe Italisë, së bashku

“Na shpëtoni kursimet, zonja Merkel”, shkruante e përditshmja gjermane “Bild” në muajin gusht. Artikujt që fajësojnë Bankën Qendrore Evropiane për normat e ulëta të interesit dhe ato që kërkojnë mbrojtje të bankave ndaj interesat negative, janë shtuar ndjeshëm së fundmi.

“Die Welt” shkruante në korrik se stimujt e Bankës Qendrore Evropiane po sjellin “konfiskimin” e kursimeve të gjermanëve.

Qasja e ashpër e gjermanëve ndaj normave të ulëta të interesit nuk është diçka e re. Vlera e kursimit është rrënjosur thellë në psikikën e vendit dhe daton që nga shekulli i 16-të.

Ekonomitë familjare mbajnë 2.4 trilionë euro në depozitat bankare, shifër që kalon atë të Francës dhe Italisë, së bashku.

Vitin e kaluar gjermanët vendosën mënjanë 10% të të ardhurave të disponueshme, që është dy herë më e madhe se norma e kursimeve në Mbretërinë e Bashkuar, transmeton Scan.

Ndërkohë që tregjet presin një ulje tjetër të normave të interesit nga Banka Qendrore Evropiane, irritimi i gjermanëve po bëhet gjithnjë e më i dukshëm. Politikanët ndajnë të njëjtën qasje me popullin gjerman. Në muajin gusht, Markus Söder, lideri i Unionit Kristian Social (CSU), tha se partia e tij do të propozojë një ligj që ndalon normat negative të interesit ndaj depozitave retail prej më pak se 100,000 euro, përcjell albinfo.ch.

Olaf Scholz, ministër i Financave, u ka kërkuar zyrtarëve që të shohin nëse kjo gjë mund të aplikohet. Banka Qendrore Evropiane dhe kritikët gjermanë janë përplasur edhe më parë.

Një padi, që pohon se programi i lehtësimit sasior (QE) i Bankës Qendrore Evropiane ka tejkaluar mandatin ligjor të institucionit po shkon drejt Gjykatës Kushtetuese gjermane. Megjithatë, është e pazakontë që Ministra e Financave të “përzihet” me politikat monetare. Kjo është bërë më e dukshme ndërkohë që ekonomia gjermane po i afrohet recesionit.

Zgjedhjet rajonale po afrojnë dhe mbrojtja e kursimtarëve po merr më shumë rëndësi. Megjithatë, pavarësisht zhurmave, normat negative të interesit për depozituesit retail duken ende të largëta. Norma e interesit për depozitat e Bankës Qendrore Evropiane qëndron në -0.4%, çka nënkupton se në vend që të paguajë interes për rezervat e tepërta të bankave dytësore, institucioni i ngarkon atyre një tarifë për t’i vendosur paratë. Disa banka, e kanë kaluar këtë kosto shtesë nga normat negative të interesit te klientët korporata dhe një pjesë shumë e vogël e ka bërë këtë edhe ndaj klientët e pasur retail,  të cilët nuk janë dakord që t’i heqin paratë pavarësisht se po i zvogëlohen.

Megjithatë, Vitor Constancio, ish zv/presidenti i Bankës Qendrore Evropiane, ka thënë për “Der Spiegel” se dyshon që bankat kanë ofruar norma negative të interesit për depozituesit e zakonshëm retail. Kjo vjen për shkak se klientët e vegjël janë rreziku më i madh i “arratisjes” drejt bankave. Vetë bankat janë kundër normave negative të interesit, pasi i redukton sasinë e parave që fitojnë nga interesi. Shoqata e Bankave Gjermane (BDB) bëri të ditur se huadhënësit gjermanë kanë paguar 2.3 miliardë euro drejt Bankës Qendrore Evropiane vitin e kaluar, shifër ekuivalente me thuajse 10% të fitimeve për vitin 2017.  Megjithatë, grupi kryesor i lobimit për sektorin financiar gjerman, është gjithashtu kundër perspektivës që Qeveria të caktojë një dysheme te normat e interesit për klientët retail.

Sipas Shoqatës së Bankave Gjermane, kjo mund të kufizojë hapësirën e bankës për manovrim dhe të shkaktojë ndërprerje financiare. Banka Qendrore Evropiane po konsideron mënyra të tjera për të zbutur tkurrjen e marzhit të interesave të bankave, si përjashtimin e disa rezervave nga interesat negative.  Kjo përplasje tregon se Banka Qendrore Evropiane duhet të jetë në dijeni të kostove për uljen e interesave mëtej.  Rreziku është se depozituesit mund të preferojnë t’i vendosin paratë poshtë jastëkut se sa në bankë.   Megjithatë, Banka Qendrore Evropiane, me të drejtë, mund të ndihet e “lodhur” nga qëndrimi i politikanëve gjermanë.  Vitor Constancio tha se zanafilla e normave të ulëta të iteresit në Eurozonë është kursimi i madh që po tejkalon shpenzimet. Fiksimi i gjermanëve me kursimin është pjesërisht faktor.

---