Gratë shqiptare shtrojnë sofrën e integrimit

Të ftuara në mbrëmjen në Geroldswil ishin gjyshe, nëna e fëmijë, si dhe presidenti i komunës, e mysafire të tjera, të cilat prezantuan projekte edukativo-shoqërore në shoqëri

Se gratë shqiptare mund të jenë realizuese të ideve madhore, për këtë na bindi edhe ndërmjetësuesja kulturore, Melihate Zhuniqi, e cila më 27 nëntor në shkollën Huebweiss të Geroldswilit në rolin e drejtueses për ‘Integrim’ organizoi një takim grash. Këtu, të ftuara ishin gjyshe, nëna e fëmijë, si dhe presidenti i komunës, e mysafire të tjera, të cilat prezantuan projekte edukativo-shoqërore në shoqëri.

Salla ishte e mbushur plot kur z.Melihate Zhuniqi e hapi programin, fillimisht duke ftuar korin e grave ‘Lyra’, i cili kishte ardhur enkas për këtë projekt

Këngët e vjetra, kënduar me nostalgji, nga kori i mërgimtareve i preku edhe të huajt me melodinë e bukur e të dhembshme.
Më pastaj z.Zhuniqi i dha i fjalën presidentit të komunës Geroldswil, Michael Deplazes, i cili kishte ardhur para se të mbushej salla dhe priste në parahyrje.

Ai përshëndeti pjesëmarrëset duke falënderuar e duke uruar me fjalë të mira për këtë tubim kaq madhor.

Presidenti, ndër të tjera, tha: “I gëzohem shumë integrimit të të gjitha kulturave që jetojnë në Zvicër, sepse integrimi e bën më të lehtë jetën e mërgimitarëve. Por përgjegjësia e integrimit nuk bie vetëm mbi mërgimtarët, integerimi është edhe obligim i vendësve, të gjithë duhet të mbështesim njëri-tjetrin”, tha ai, duke premtuar se ky takim nuk do të jetë i fundit.

Ai në mbyllje të fjalimit e tha një fjalë të urtë: “Kush nuk është miqësor ndaj tjetrit, ai nuk ka udhëtuar kurrë”, që u pëlye nga të pranishmit.

Pastaj fjalën e mori e ftuara, z.Ursi Wyss, drejtuese e kopshtit për fëmijë “Spielgruppe plus” në Fahrweit, që kryesisht financohet nga komuna, e pjesërisht nga prindërit. Pra, është një projekt për të vegjël, ku ata përmes lojës mësojnë gjuhën dhe shoqërohen me fëmijët e tjerë.

Më vonë, e buzëqeshur si një mike e shquar e grave shqiptare, fjalën e mori Ana Pelllegrino Jimenez, drejtuese pranë programit integrues ‘Femmes Tisch’. Ajo po ashtu prezantoi takimet e grave, ku janë të përfshira edhe shumë gra shqiptare.
Në këto takime është e angazhuar edhe z.Zhuniqi në pozitën e moderatores në takimet e grave, ku shtjellohen tema nga jeta sociale, pedagogjike e arsimore.

 

Në mesin tonë ishte edhe psikologia shqiptare, Luljeta Shaqiri, e cila udhëheq me përvojën e vet një këshillimore në ‘Greifensee’. Luljeta apeloi te nënat shqiptare që të integrohen sa më shumë për hir të fëmijëve të tyre, për të kuptuar më leht rrugën e shkollimit të tyre, për ta bërë sa më të fuqishme mbështetjen prindërore.

Ajo tha, mes tjerash, se “shkolla shqipe po vuan për mungesën e nxënësve, derisa e vërteta është se fëmijët që flasin më mirë gjuhën e vet kanë më shumë mundësinë për të mësuar edhe gjuhët e tjera edhe më lehtë”.

Një mesazh fisnik e dha edhe mësuesja e diplomuar në Zvicër, Ermira Ljutvija: “Ju lutem, dërgoni fëmijët në shkollën shqipe. Unë sot e ndjej akoma mungesën e shkollës shqipe, sepse s’kam mundur ta ndjek atë, ngase nuk kanë qenë aktive shkollat shqipe në të kaluarën, sikur janë mundësitë sot”, u shpreh Ermira, mësuesja që i mëson fëmijët e huaj e zviceranë, duke shprehur dashurinë e madhe për fëmijët shqiptarë.

“Nxënësit e mi shqiptarë tani kanë dëshirë të gjithë të bëhen mësues, unë u them: “Zgjidhni profesionin që dëshironi dhe bëhuni të mirë në profesionet tuaja kudo që të jeni”, u shpreh Ermira me dashuri për nxënësit e saj.

Ishin edhe dy mësuese të tjera: mësuesja Blerta dhe mësuesja Sadete, edhe ato lanë me fjalët më të bukura këtë mesazh: “Dërgoni fëmijët në shkollën shqipe!”

Udhëheqësja e takimit, z.Zhuniqi, e mori rolin e saj të animatorës, duke u lexuar fëmijëve një përrallë të bukur.

Me këtë aktivitet ajo shpjegoi rolin e një animatoreje për fëmijë. Ideja e saj ishte që të pranishmit ta shihnin e të ndjenin se sa e fuqishme është përralla në botën e fëmijëve.

“Nuk duhet të presim që fëmija të kontaktojë në shkollë me librin”, u shpreh z.Zhuniqi, duke shtuar: “Sot fëmijët që jetojnë në Zvicër kanë mundësinë të vizitojnë projekte të drejtuara nga animatore të arsimuara në këtë drejtim, ku fëmijët përfitojnë, ndërsa prindërit motivohen dhe të gjitha këto aktivitete ofrohen falas në shtetin ku jetojmë. Në një projekt të tillë jam e angazhuar edhe unë. Fëmijët bëhen më aktivë e më kreativë, ata përmes lojës e zhvillojnë dijen dhe fantazinë… e mësojnë gjuhën dhe kulturën amtare dhe kështu më lehtë kuptohen në gjuhën e zemrës edhe me gjyshër, familjarë e me prindër”.

Pyetjes sonë se cili ishte qëllimi i këtij takimi, z.Zhuniqi iu përgjigj: “Qëllimi im ishte sa human, aq shoqëror, pra t’i prezantojprojektet e vlefshme shoqërore, siç edhe u panë këtu. Pra : projekti ‘Femmes Tisch’, ku moderoj takimet e grave nëpër shkolla e institucione të tjera, projekti “Spielgruppe plus” që është buzëqeshja e fëmijëve tanë, ata aty mësojnë gjuhën dhe në shkollë, pastaj ndihen më të sigurt e më krenarë, projekti i animimeve shqipe, ku tregojmë përrralla e vizatojmë me fëmijët që vijnë me nëna apo me gjyshe, ku fëmijët bëhen më aktivë përmes ngjyrosjes, këngës, vjershës e përrallës, pastaj projekti i shkollës shqipe, etj.

Prandaj jam fmirënjohëse për një prezencë kaq të madhe dhe një sjellje plot dinjitet të grave shqiptare, që me të vërtetë kanë treguar një kulturë të madhe. Pastaj komplimentet e pyetësorit më kanë bërë të ndjehem vërtet guximtare, i falënderoj të gjitha si për komplimentet e tyre që më nxisin për të mos u ndalur fare dhe, në veçanti e falënderoj psikologen shqiptare, Luljeta Shaqiri, e cila këtu mori shembuj konkretë për vizione të reja integrimi, e duke e ruajtur edhe kulturën tonë të shenjtë. Ajo të nesërmen, pa e kursyer kohën e vet, më kishte shkruar një letër me falënderime, e cila për mua është një amuletë e bukur motivimi”, shprehet z.Zhuniqi, e lumtur që u bë buzëqeshja në fytyrat e nënave dhe fëmijëve që ishin mirënjohës të këtij takimi.

Disa nga fëmijët shkëlqenin në veshje kombëtare.

Drejtuesja e programit, pra z.Zhuniqi, me një talent moderimi e me zemër bujarie prej organizimibujari i ftoi gjyshet në skenë së bashku me fëmijët, ku kënduan këngën e gjyshes në gjuhën shqipe.

Harmonia e dashuria me gëzim e mallëngjim e përcolli në zemrat e të pranishmeve këtë takim.

Grupi i valltarëve “Rinia” nga Spreitenbach-u i dha shpirtin festiv këtij takimi që ishte në prag të Festës së Flamurit. Ata vallëzuan vallet më të bukura shqiptare, ndërsa më pastaj një çun me lahutë, Andrin Krasniqi, këndoi këngën e Gjergj Kastriotit.
Fëmijët patën rastin të ngjyrosin flamuj e të frynin balonat me ngjyra të ndryshme.

Manifestimi nuk pati vallëzim nga të pranishmet, sepse qëllimi i takimit kishte karakterin integrues dhe edukativo-shoqëror, por atmosfera u përcoll pa zhurmë e me shumë duartrokitje.

Gratë shqiptare darkuan edhe një herë së bashku ushqimet që kishin sjellë me vete dhe dolën duke marrë shumë informata.
Moderatorja udhëheqëse e këtij projekti të pritur mirë nga të pranishmit ka falënderuar të gjithë ata që këtij organizimi i falën shkëlqimin e cilësinë.

Ajo falënderoi gjyshet, nënat e fëmijët, për prezencën dhe për sjelljen e ushqimeve tradicionale, falënderoi shkollën që kishte ofruar një sallë aq të përshtatshme, falënderoi presidentin që ndau kohën dhe përshëndeti me fjalë të mëdha, falënderoi drejtuesen e ‘Spielgruppe plus’, falënderoi korin e grave “Lyra” që e mbushën sallën me nostalgji gëzimi të tingullit shqip, falënderoi z.Pellegrino për prezantimin e projektit ‘Femmes Tisch”, falënderoi psiklogen për fjalimin e saj të shenjtë, falënderoi mësueset tona që angazhohen për vlerat tona edhe në kurbet, falënderoi redaksinë e revistës për fëmijë “Ura” dhe redaksinë e Albinfo.ch për revistat që u shpërndanë falas, duke na pasuruar me njohuri në çdo aspekt. Ajo falënderoi më tutje edhe projektin ideator të integrimit NCBI për mbështetjen morale dhe për reflektimin paqësor mes kulturave në këtë vend, falënderoi e falënderoi, pra, të gjithë me përzemërsi e shumë respekt.

---