Politika duhet të jetë instrumenti për bashkim thotë Rama

"Politika është i vetmi instrument në dorën e njeriut për t’u bashkuar me të tjerë dhe për të bërë të mundura gjëra që janë të pamundura"

Kryeministri Edi Rama ka marrë pjesë në hapjen e vitit të ri të Akademisë Politike të Partisë Socialiste ku ka folur para studentëve të kësaj akademie duke thënë se të gjithë duhet të mësojnë që politika nuk është e keqe po një forcë për të bërë të mundura ndryshimet.

Ai ka theksuar se në ditët e sotme ka shumë arsye për të qenë të demotivuar me ato që thuhen, dëgjohen e debatohen me mënyrën se si shpërdorohet fuqia e politikës për qëllim e agjenda të ndryshme.

“Politika është i vetmi instrument në dorën e njeriut për t’u bashkuar me të tjerë dhe për të bërë të mundura gjëra që janë të pamundura. Njerëz të tjerë që nuk e konsiderojnë se është fakti se kush thotë nuk merrem me politikë, gënjen veten, sepse politika merret me të”, ka thënë kryeministri Rama.