Shqipëria, atraktive edhe për turizmin shëndetësor

Më së shumti turistët e huaj, e në të shumtën e rasteve emigrantët, kërkojnë shërbimet dentare, gjithashtu edhe ato estetike.

Shqipëria është bërë një vend atraktiv jo vetëm se ka detin, por edhe për turizmin shëndetësor.
Më së shumti turistët e huaj, e në të shumtën e rasteve emigrantët, kërkojnë shërbimet dentare, gjithashtu edhe ato estetike.
Sipas të dhënave të INSTAT, në 9 muajt e parë të 2017-ës numri i të huajve, të cilët kanë ardhur në Shqipëri për trajtim shëndetësor ka qenë 378, më rënie rreth 24 % nga e njëjta periudhë e një viti më parë, në të cilën ishte 499, përcjell albinfo.ch.
Sipas studimeve, personat e gatshëm për të udhëtuar për shërbime dentare apo trajtime estetike kanë si kriter parësor për vendimin e tyre cilësinë e lartë të shërbimit, koston e ulët dhe pajisje me teknologji të përparuara.
Shkaku i ardhjes së turistëve dentarë vijon të jetë çmimi.
Klinika të ndryshme në Tiranë tregojnë se sidomos për shërbime dentare, si proteza, implantologji etj., çmimet janë deri në 70% më të lira se në Itali, nga ku mbërrijnë pjesa më e madhe e pacientëve.
“Nëse në Itali, për një implant duhet të paguash deri në 1500 euro, në Shqipëri, çmimi nuk i kalon 650 euro”, pohojnë ata, raporton Monitor.