Dënohet sulmi ndaj bashkëshortes së ministrit Stavileci

“Vitore Stavileci, shtetase e Republikës së Kosovës, ka pësuar lëndime trupore dhe është dërguar për tretman mjekësor, në QKUK”, thuhet në njoftimin e policisë

Është sulmuar sot bashkëshortja e anëtarit të PDK-së, ministrit në detyrë, Blerand Stavileci. Policia e ka konfirmuar sulmin fizik ndaj gruas së Stavilecit. Ngjarja ka ndodhur në mesditë në lagjen Veternik.

“Vitore Stavileci, shtetase e Republikës së Kosovës, ka pësuar lëndime trupore dhe është dërguar për tretman mjekësor, në QKUK”, thuhet në njoftimin e policisë. Policia thotë se po punon në kapjen e personave të dyshuar.

Ndaj sulmit ka reaguar nënkryetari i PDK-së, Enver Hoxhaj. “Sulmi ndaj bashkëshortes së zëdhënësit të Partisë Demokratike të Kosovës, Blerand Stavileci është i papranueshëm dhe qyqar. Është sulm ndaj një nëne, ndaj një gruaje dhe mbi të gjitha ndaj një qytetare të Kosovës. Tendenca e theksuar për të ndjellur frikë përmes sulmeve fizike tek anëtarët e PDK-së nuk do të arrijë ta ndalë angazhimin dhe punën tonë në të mirë të Kosovës dhe qytetarëve të saj”, ka shkruar Hoxhaj në reagimin e tij.