Euro 2016 : Simbolika që përmbajnë emrat e lojtarëve shqiptaro- zvicerane

Çfarë kuptimi kanë emrat e lojtarëve me origjinë shqiptare ?

Në Shqipëri, Kosovë dhe Maqedoni është e zakonshme që një emër i përveçëm të jetë i frymëzuar nga një emër vendi, një emër i përgjithshëm ose nga elemente natyrore me simbolikë të fortë. Platforma Albinfo.ch me rastin e Euro 2016 vendosi t’ju shpjegojë kuptimin që mbajnë emrat e lojtarëve shqiptarë me nënshtetësi zvicerane që luajnë për ekipin zviceran, apo për ekipin shqiptar, shkruan albinfo.ch.

Le të fillojmë me lojtarët e ekipit zviceran, dhe Valon Behramin, mesfushorin e ekipit Watford, anëtar i përzgjedhjes zvicerane. « Valon » do të thotë valë ose gurgullimë, por kuptimi më i njohur i referohet valëvitjes së flamurit. Prandaj flasim për një emër me konotacion patriotik. Në këtë grup emrash hyn edhe emri i Xherdan Shaqirit, lojtar i Stoke City dhe sulmuesi yll i « Nati ». Nëse fjala « xherdan» mund të ketë kuptim e një vargu me gurë të çmuar, zakonisht i varur në qafë nga një grua, në këtë rast, ai merr kuptimin e tij të dytë, zinxhir ku luftëtari mban fishekët. Le te shpresojmë se Shaqiri do ti mbaj disa fishekë në rezervë për të shënuar sa më shumë gola dhe për të mbrojtur ngjyrat e ekipit zviceran!

Në një regjistër më paqësor, mund të flasim për Blerim Xhemajlin dhe Pajtim Kasamin, lojtarët e Genoa CFC dhe të ekipit grek Olympiakos, respektivisht. « Blerim » do të thotë lulëzim, ndërsa emri « Pajtim », në një vend të prekur nga hakmarrja mund të imagjinohet që është dhënë me shpresën për të pajtuar gjaqet.

Emra të tjerë janë të frymëzuar nga elementet natyrore. Në gjuhën shqipe, granit është emri i një shkëmbi të fortë që simbolizon fuqinë. Kjo është origjina e emrit të Granit Xhakës, ndërkombëtar i cili iu bashkua Arsenalit FC nga që muaji maj i këtij viti për të shënuar transferimin më të madh në historinë e futbollit zviceran, për një shumë që i kalon 50 milionë frangat.

Le të kalojmë te lojtarët e ekipit shqiptar që mbajnë nënshtetësinë zvicerane. Ata janë jo më pak se dhjetë.

Emrat e mbrojtësve Taulant Xhaka, lojtar i FC Basel, dhe Lorik Cana, i cili është edhe kapiten i ekipit shqiptar kanë prejardhje nga historia e lashtë e popullit shqiptar. Lorik është emri i një mbreti ilir. Shqiptarët janë pasardhës të ilirëve, popull i lashtë i përbërë nga fise të ndryshme, mbretëria e të cilëve u themelua në shekullin e katërt para Krishtit, në Shkodër. Emri Taulant është i marrë nga emri i një prej fiseve të rëndësishme ilire, Taulantët, të cilët ishin të vendosur në mes të lumenjve Vjosë dhe Mat, përgjatë bregdetit Adriatik. Emrat e këtyre dy lumenjve janë po ashtu emra të përveçëm, mashkullor dhe femëror, respektivisht.

Në historinë e saj më të fundit, Shqipëria u pushtua nga Perandoria Osmane dhe mbeti nën sundimin e saj për më shumë se pesë shekuj. Prandaj ajo ka mbajtur një ndikim oriental të fortë dhe shumë emra me origjinë arabe. Në këtë regjistër, gjejmë atë të Amir Abrashit mesfushorit të SC Freiburg, emri i të cilit do të thotë princ ose i pavdekshëm në gjuhën arabe, dhe atë të Naser Alijit, mbrojtës i FC Basel, që në arabisht do të thotë, « mbrojtës » ose « ai që ndihmon ».

Sot, populli shqiptar është i grisur pjesërisht, i ndarë në disa kombe, dhe Kosovarët, të etur për të parë një Shqipëri të madhe dhe të bashkuar, shumë shpesh u japin fëmijëve të tyre emrin e qyteteve shqiptare. Për shembull, është e zakonshme që dikush të quhet Sarandë apo Berat, siç është rasti i Berat Gjimshitit, mbrojtës i ekipit italian Atalanta.

Disa emra pasqyrojnë thjesht gëzimin e prindërve me lindjen e një fëmije të ri. Në këtë repertor gjejmë emrin e Burim Kukelit, lojtar i FC Zürich, që pasqyron një burim gëzimi, kurse emri Arlind, është i përbërë nga dy emra të përbashkët, ar dhe lindje, pra një lindje e arte. Ky është emri që mbart Arlind Ajeti, mbrojtës i ekipit italian Frosinone Calcio.

Vëllezërit Basha, të lindur në Lozanë, quhen Vullnet dhe Migjen. Vullneti është vetia e njeriut për të plotësuar me vendosmëri, këmbëngulje dhe forcë qëllimet e tij. Migjen është emri i poetit të famshëm shqiptar të shekullit të XX, vargjet e tij ishin kritike dhe të frymëzuara nga varfëria e vendit dhe e popullit.

Për ta mbyllur listën me emrat e lojtarëve le të citojmë Shkëlzen Gashin, mesfushorin që luan për klubin trans-atlantik Colorado Rapids, emri i të cilit do të thotë, shkëlqim, dhe në mënyrë të figurshme lavdi. Prandaj, le të shpresojmë se emri i ish-sulmuesit të FC Basel të jetë paralajmërues për ekipet tona shqiptare dhe zvicerane.

Shkrim i botuar në gazetën Le Temps, në bashkëpunim me Albinfo.ch