Shqipëria

Kryediplomati zviceran: Shqipëria, vend me prioritet për Zvicrën

E hënë, 23 Nëntor 2020 - 17:40 albinfo.ch

Ministri i Punëve të Jashtme të Zvicrës ka vizituar për herë të parë Shqipërinë dhe sapo ka pasur një takim të frytshëm me ministrin në Detyrë, me shkas 50-vjetorin e marrëdhënieve Zvicër-Shqipëri.

“Shqipëria është dhe do të vazhdojë të jetë një vend me prioritet për Zvicrën”, ka thënë ministri i Punëve të Jashtme të Zvicrës, Ignazio Cassis.

Të dy ministrat vlerësuan ndërveprimin dypalësh me theks të veçantë punën e mirë për zbatimin e strategjisë së bashkëpunimit 2018-2021, si një strategji që i jep përparësi punës së përbashkët, sa i përket qeverisjes demokratike, zhvillimit ekonomik, infrastrukturës dhe shëndetësisë.

Më tej, homologët biseduan mbi rëndësinë e mbylljes së marrëveshjes për sigurimet shoqërore dhe ngritjen e komisionit të përbashkët ekonomik.

Siç theksoi Ministri në detyrë Cakaj në një reagim në Facebook, lidhur me takimin e zhvilluar, Shqipëria dhe Zvicra gëzojnë një bashkëpunim të shkëlqyer në rrafshin e diplomacisë shumëpalëshe, veçanërisht në OSBE. Gjithashtu, Cakaj bëri me dije se me Zvicrën tashmë është këmbyer mbështetja për kandidaturat e dy vendeve si anëtare jo të përhershme të Këshillit të Sigurimit. Për më tepër, Cakaj dhe Cassis u dakordësuan për të thelluar bashkëpunimin teknik dhe institucional edhe në këtë drejtim.

“Përndryshe, të dy shprehëm gëzimin e pamasë që në pesëdhjetë vjetorin e vendosjes së marrëdhënieve diplomatike mes dy vendeve tona, bashkëpunimi mes nesh është jo vetëm jashtëzakonisht i mirë, por edhe gjithnjë në rritje e sipër.” – u shpreh Cakaj.

Në përfundim të reagimit, Kryediplomati Cakaj i shprehu mirënjohjen Zvicrës mike për mbështetjen e pakursyer dhënë Shqipërisë  ndër vite, përfshirë procesin e rindërtimit pas tërmetit dhe procesin e menaxhimit të pandemisë COVID-19.

 

 

 Të ngjashme

A po i shkel Zvicra ligjet e ekonomisë?

 Të tjera nga Shqipëria

A rrezikon të dështojë vota e diasporës në Shqipëri?

 E-Diaspora

 Jeta në Zvicër