350 mijë nxënës fillojnë sot mësimin në Shqipëri

Sipas Ministrisë së Arsimit të Shqipërisë, janë në total 350 mijë nxënës, ndërsa 28 mijë prej tyre e kalojnë për herë të parë pragun e shkollës

Pushimet verore përfunduan dhe sot nxënësit e arsimit parauniversitar në Shqipëri rikthehen në bankat e shkollës për vitin e ri arsimor 2024-2025.

Sipas Ministrisë së Arsimit të Shqipërisë, janë në total 350 mijë nxënës, ndërsa 28 mijë prej tyre e kalojnë për herë të parë pragun e shkollës, transmeton albinfo.ch.

Rënia e numrit të nxënësve në gjithë Shqipërinë vazhdon edhe këtë sezon mësimor. 1 mijë të vegjël më pak janë regjistruar në klasat e para, ndërkohë që raportohet mbyllja e shkollave në zonat rurale të disa qyteteve.

Me fillimin e shkollës, ministra e Arsimit dhe Sportit e Shqipërisë, Ogerta Manastirliu, ka uruar të gjithë nxënësit, mësuesit dhe prindërit.

Mesazhi i plotë i ministres së Arsimit dhe Sportit, Ogerta Manastirliu:

Të dashur nxënës, prindër dhe mësues! Sot fillojmë këtë rrugëtim të vitit të ri shkollor së bashku, edhe unë jam po aq e emocionuar sa ju, sepse çdo vit sjell sfida dhe mundësi të reja për të gjithë.

350 mijë nxënës ulen sot në bankat e shkollave, ndërsa rreth 28 mijë prej tyre e kalojnë për herë të parë pragun e shkollës.

Të dashur nxënës të klasës së parë, shkolla është vendi ku ju do të mësoni, do të zbuloni botën, dhe më e rëndësishmja, të ndërtoni të ardhmen tuaj.

Kemi punuar fort që këtë vit të keni mundësinë të mësoni në shkolla edhe më moderne, që mësuesit të jenë edhe më të motivuar, që shkollat të jenë më të pajisura me materialet didaktike të nevojshme, të cilat do t’ju ndihmojnë të zhvilloni intelektin dhe personalitetin tuaj që nga fillimi i shkollimit dhe gjatë gjithë edukimit tuaj. Mundësuam tekstet shkollore falas për 238 mijë nxënës të shkollave 9-vjeçare dhe për 16 kategori të veçanta të nxënësve në gjimnaze.

Investimet në infrastrukturën shkollore kanë mundësuar që sot të hapin dyert 25 shkolla të rindërtuara, të cilat mirëpresin rreth 10 mijë nxënës dhe mësues. Vetëm përgjatë këtij viti kemi investuar dhe po investojmë në rindërtimin dhe rehabilitimin e 100 objekteve arsimore në të gjithë vendin.

Në një epokë ku teknologjia po ndryshon me shpejtësi mënyrën se si mësojmë dhe punojmë, kemi hyrë në një fazë shumë të rëndësishme për të përmirësuar aftësitë digjitale, aftësitë kreative dhe nxitjen e mendimit kritik.

Këtë vit, 200 shkolla 9-vjeçare janë pajisur me 216 laboratorë SMART, duke u dhënë nxënësve mundësinë të mësojnë përmes kurrikulës së re të TIK dhe programit Code Monkey, ku rreth 35 mijë nxënës janë tashmë të përfshirë në këto klasa.

Rrugëtimi juaj drejt dijes nuk është vetëm i juaji, por edhe i prindërve dhe mësuesve tuaj që do të jenë aty për t’ju mbështetur në çdo hap.

Ky vit i ri shkollor i gjen mësuesit me pagat e rritura, duke mundësuar qe mbi 30 mije mësues te sistemit tone arsimor te kene page dinjitoze.

Vlerësimi dhe mbështetja për mësuesit janë thelbësore për një sistem që fokusohet te cilësia, ndaj, veç mbështetjes financiare, do të vijojmë të zhvillojmë programet e trajnimeve falas për të rritur kompetencat profesionale të tyre, me synim që mbi 16 mijë mësues të trajnohen përmes Programit Kombëtar i Zhvillimit Profesional.

Këtë vit do të kemi zhvillime të reja brenda shkollës, përmes roleve të reja të mësuesve:

640 mësues do të angazhohen gjithashtu si koordinatorë të sigurimit të cilësisë për mësimdhënien dhe orientimin e karrierës, bazuar në evidentimin e prirjeve dhe talenteve në çdo shkollë, duke ju ndihmuar ju dhe prindërit në zgjedhjet që do të bëni për të ardhmen tuaj.

Një prioritet i yni është edukimi gjithëpërfshirës dhe i barabartë për të gjithë fëmijët.

Këtë vit kemi rritur numrin e mësuesve ndihmës me 200, duke e çuar në 2100 numrin total të mësuesve ndihmës, të cilët garantojnë mbështetje mësimore për nxënësit me aftësi të veçanta.

Krijimi i mundësive për një stil jetese të shëndetshëm dhe aktiv për nxënësit është po aq i rëndësishëm për ne. Për këtë arsye, në vitin e ri shkollor po investojmë në terrene sportive dhe palestra moderne në shkolla, si pjesë e “Lëvizjes Sportive në shkolla”; programi ynë kombëtar tashmë ka përfshirë mbi 10 mijë nxënës, me synimin për të zgjeruar më tej këtë program duke shtuar disiplina të reja sportive dhe duke e shtrirë në të gjitha ciklet arsimore.

Programet e nisura, si “Art dhe Zeje”, “Shkolla Qendër Komunitare”, Olimpiadat, Konkurset dhe një sërë programesh të reja do të shoqërojnë këtë vit shkollor, duke ju mundësuar një program sa më të pasur shkollor dhe jashtëshkollor.

Ju uroj suksese në këtë rrugëtim të bukur që sapo ka nisur!

Na qoftë i mbarë!

---