Sondazhi tregon se sa kanë frikë zviceranët nga koronavirusi

Koronavirusi ka një ndikim të theksuar në gjendjen shpirtërore të popullatës zvicerane. Këtë e tregon një sondazh i porositur nga SRG

Mbi gjysma e zviceranëve e vlerësojnë  të keqe ose shumë të keqe gjendjen shpirtërore për shkak të pandemisë së koronës, shkruan sda.ch.

Për shkak të valës së dytë, më shumë se 80 për qind e të anketuarve supozojnë se normaliteti do të kthehet jo më herët se në verën e vitit 2021.

Shqetësimet në lidhje me izolimin shoqëror dhe vetminë, të shkaktuara nga korona, janë rritur nga 30 për qind sa ishin në qershor në 46 për qind, në tetor, trasmeton albinfo.ch. Këtë e tregon rezultati i sondazhit më të ri të realizuar me porosi të SRG, “Corona Monitor”, të botuar të premten, për të cilin janë përfshirë në analizë përgjigjet nga rreth 42.425 të anketuar.

Shqetësimi kryesor: liria personale

Me valën e dytë të koronës, është rritur gjithashtu frika nga sëmundja. 45 për qind e të anketuarve janë shprehur se kanë frikë prej saj. Kjo nuk korrespondon shumë me vlerën e regjistruar në fillim të pandemisë, në muajin mars, por është dukshëm më shumë se në qershor kur ishin 31 për qind që kishin frikë.

Liritë personale mbeten shqetësimi numër një, në raport me pandeminë. 55 për qind e të anketuarve e konsiderojnë këtë si një nga shqetësimet kryesore në lidhje me pandeminë.

Detyrimi për maskë, gjen mbështetje në popull

63 për qind kanë thënë se do të sillen me më shumë kujdes kur të rritet numri i rasteve. Vetëm 16 për qind do të vaksinoheshin menjëherë nëse një vaksinim Covid 19 miratohet në Zvicër, përcjell albinfo.ch. 28 për qind përgjithësisht do të refuzonin  vaksinimin. Pjesa më e madhe e popullsisë do të vendosë në varësi të situatës, se si do të veprojë.

Tani ka një mbështetje të gjerë për zgjerimin e detyrimit për mbajtje të maskës. 64 për qind janë pak a shumë në favor të vëniees së saj të detyrueshme në punë. Një shumicë e qartë (59 për qind) gjithashtu mendon se është e drejtë që detyrmi për maskë të zbatohet edhe jashtë ambienteve të mbyllura, të paktën herë pas here.

Mbështetja për qeverinë, rritet kur ajo merr masa

Masat e ngadalësimit ë pandemisë, të vendosura nga Këshilli Federal më 28 tetor mbështeten gjithashtu nga popullsia. Dy të tretat e të anketuarve janë në favor të këtyre kufizimeve, përcjell albinfo.ch. Ndërkohë, miratimi për një bllokim të shkurtër është rritur: nëse para 28 tetorit 49 për qind e popullsisë ishin shprehur në favor të tij, miratimi është rritur në 54 për qind, në ditët pasuese.

Vetëm 37 për qind e të anketuarve kishin deklaruar para shtrëngimit të masave se ata kanë besim të madh ose shumë të madh në Këshillin Federal – ndërsa në qershor kjo shkallë ishte 66 për qind. Megjithatë, në ditët në vijim, kjo vlerë është rritur sërish deri diku, dhe ka arritur në 44 për qind.

Sondazhi i realizuar nga qendra kërkimore Sotomo me porosi të Monitorit të 5-të SRG  është kryer në dy segmente, trasnmeton albinfo.ch. Vlerësimi kryesor ka zgjatur nga 23 më 28 tetor 2020 dhe në të kanë marrë pjesë gjithsej 34.872 njerëz.

Për të qenë në gjendje të shqyrtohen efektet e drejtpërdrejta të vendimeve të qeverisë (të marra më 28 tetor), kohëzgjatja e sondazhit është zgjatur deri më 2 nëntor.

Gjatë kësaj kohe janë kryer edhe 7553 intervista të tjera.

---